विश्वकपमा फितलो प्रदर्शनका कारण चौतर्फी आलोचना खेपिरहेको अर्जेन्टिनी टोलीसँग लिजेण्ड फुटबलर डिएगो म्याराडोनाले भेट्न चाहेको बताएका छन् । अर्जेन्टिनाले समूह चरणको अन्तिम खेलमा नाइजेरियाको सामना गर्नुअघि म्याराडोनाले खेलाडीलाई भेट्न खोजेका हुन् । म्याराडोनाले प्रशिक्षक जर्ज साम्पाओलीको टिमका खेलाडीलाई भेट्न इच्छुक रहेको बताएका छन् । उनले आफ्नो साथमा आफ्ना पुराना साथी खेलाडीलाई पनि लैजाने बताएका छन् ।

टिमको पछिल्लो प्रदर्शनलाई लिएर म्यारोडोनाले चर्को आलोचना गर्दै आएका छन् । उनले प्रशिक्षक साम्पाओलीसँगै फुटबल एसोसिएसनका अध्यक्ष क्लाउडिओ तापिएको पनि आलोचना गरेका छन् ।
भेनेजुएलाको टेलिभिजन तेलेसुरसँगको अन्तर्वार्ताको क्रममा म्याराडोनाले भने, ‘हामी हाम्रो सम्मान बचाउने अभियानमा छौँ ।’ अर्जेन्टिनाको जर्सी लगाएको कोही पनि क्रोएसियाबाट त्यसरी पराजित भएको देख्न सक्ने अवस्थामा नरहेको उनको भनाइ छ । त्यो हार जर्मनी, ब्राजिल, नेदरल्याण्डस वा स्पेनबाट भएको भए स्वभाविक मान्ने उनले बताए । सन् १९८६ मा अर्जेन्टिनाले विश्वकप जित्दा म्यराडोनाले गोल्डेन बल जितेका थिए ।

अर्जेन्टिनाले मंगलबार समूह चरणको अन्तिम खेलमा नाइजेरियासँग प्रतिस्पर्धा गर्दैछ । क्रोएसियासँग ३–० ले पराजित भएपछि दुई पटकको विश्व विजेता अर्जेन्टिनालाई अन्तिम १६ मा पुग्ने सम्भावनाका लागि नाइजेरियालाई हराउनु पर्नेछ ।

प्रकाशित समय : १३:१४ बजे