तारा एअरले इलामको सुकिलुम्बा विमानस्थलमा उडान सेवा सुरु गर्ने भएको छ । इलाम नगरपालिका र तारा एयर प्रा.लि.बीच माघ ३ गते उडान सुरु गर्ने सम्झौता भएको हो ।

सम्झौताअनुसार आगामी फागुन ८ देखि प्रत्येक आइतबार उडान-अवतरण हुने निश्चित भएको नेपाल पर्यटन बोर्डका सदस्य तथा पर्यटन व्यवसायी कृष्ण शाहले जानकारी दिए ।

नगरपालिकाले १२ उडानका लागि सम्झौतापत्रमा हस्ताक्षर गरेको छ । १६ यात्रु सिट क्षमता भएको जहाजले एकतर्फी भाडा आठ हजार ७ सयमा उडान गर्नेछ ।

सम्झौताअनुसार ११/११ जनाको आउने-जाने भाडा इलाम नगरपालिकाले नै तिर्नुपर्नेछ । नगरपालिकाले एकतर्फी भाडा तिरे दुइतर्फ उड्न सहुलियत दिने समेत बताइएको छ । शाहले भने, ‘इलाम आफैमा राम्रो पर्यटकीय गन्तव्य हो । इलामलाई प्रकृति र संस्कृतिको संगम मान्ने गरिन्छ । त्यहाँ पर्यटन, कृषि पर्यटन, चिया पर्यटन, धार्मिक, सांस्कृतिक पर्यटन र मनोरञ्जन पर्यटनको सम्भावना छ । हवाई सेवा नियमित हुन सके इलाम जाने पर्यटकको संख्या बढ्ने हाम्रो अपेक्षा छ ।’ 

पूर्व जान चाहने आन्तरिक पर्यटकको संख्या बढिरहेपनि सडक यातायातबाट जाँदा बढी समय लाग्ने भएकोले हवाई यात्राबाट पर्यटक संख्या बढ्ने उनको भनाइ छ ।

इलाममा सन्दकपुर, माईपोखरी, कन्याम-अन्तुसर्किट, छिन्टापु, सानो पाथीभरा, सिद्धिथुम्का, माङ्मालुङ, माङ्सेबुङ, गजुरमुखी, रेड पाण्डा पाइने वन तथा इलाम सदरमुकाम, पशुपतिनगर आदीले पर्यटक आकर्षित गर्ने विश्वास गरिएको छ ।

प्रकाशित समय : ०१:३७ बजे