‘फर्निचर तथा फर्निसिङ एक्स्पो’ फर्नेक्स भदौ १४ गतेदेखि काठमाडौंको भृकुटीमण्डपमा आयोजना हुने भएको छ । सोमबार काठमाडौंमा पत्रकार सम्मेलन गरी आयोजक संस्था नेपाल फर्निचर्स तथा फर्निसिङ संघले एक्स्पोबारे जानकारी गराएको हो ।

एक्स्पोको छैटौं संस्करण फर्नेक्स २०१८ लाई होम डेकोर विशेष बनाइने संघले जनाएको छ । आधुनिक जीवनशैलीसँगै बढ्दै गएको इन्टेरियर डिजाइनका लागि एक्स्पो उचित गन्तव्य हुने आयोजकको विश्वास छ । एक्स्पोको व्यवस्थापन इभेन्ट सोलुसन प्रालिले गर्नेछ ।

किचन, बेडरुम र बाथरुमका साथै आउटडोर फर्निचर, इन्टेरियर डिजाइनर, कार्पेट, मार्बललगायत सामग्री प्रदर्शनीको मुख्य आकर्षण रहनेछन् । यसैगरी कार्पेट, पर्दा, म्याट्रेस, डेकोरेसन सामग्री, होम डेकोर, अफिस फर्निर, होम अप्लाइन्सेज र मेसिनरी औजारका साथै वास्तुसँग सम्बन्धित उत्पादन प्रदर्शनीको आकर्षण बन्ने आयोजकले जनाएको छ ।

एक्स्पोमा फर्निचरको प्रदर्शनीमात्र नगरी त्यसको उपयोगिता, प्रयोग विधि र बनोटका बारेमा पनि अवलोकनकर्तालाई जानकारी गराउने आयोजकको तयारी छ । यसबाहेक फर्निसिङ व्यवसायमा आधुनिक प्रविधि भित्र्याउँदै फर्निचरजन्य उत्पादनमा मुलुकलाई आत्मनिर्भर बनाउन एक्स्पोले टेवा पुर्याउने संघका अध्यक्ष राजेश अग्रवालले बताए ।

बर्सेनि आयोजना हुँदै आएको एक्स्पोको छैटौं संस्करणबाट व्यवसायी तथा उपभोक्ता दुवै लाभान्वित हुने फर्नेक्स–२०१८ का संयोजक शुभेन्द्र जोशीको भनाइ छ । इभेन्ट सोलुसनका प्रबन्ध निर्देशक विजयसागर प्रधानले फरक शैलीमा एक्स्पोको छैटौं संस्करण आयोजना हुन लागेको बताए ।

पाँच दिन चल्ले एक्स्पोमा स्वदेशी तथा विदेशी गरी एक सयभन्दा बढी फर्निचर र फर्निसिङ सामग्रीका स्टल रहनेछन् । नेपालमा उपलब्ध फर्निचर तथा फर्निसिङका उत्पादनको प्रवद्र्धन गर्ने उद्देश्यले सन् २०१२ देखि नियमित एक्स्पो आयोजना हुँदै आएको छ । नेपालमा बर्सेनि फर्निचर तथा फर्निसिङका उत्पादनको ३० अर्ब रुपैयाँबराबरको कारोबार हुने गरेको आंकलन छ ।

प्रकाशित समय : २१:३३ बजे