प्रतिवेदन परिमार्जनका लागि कार्यदल बनाउने प्रचण्डको प्रस्ताव
वि.सं.२०७५ पुस ११ बुधवार १७:४८
shares

नेकपाका अध्यक्ष पुष्पकमल दाहालले स्थायी कमिटी बैठकमा पेश भएको राजनीतिक प्रतिवेदन संशोधन गर्न कार्यदल गठन गर्ने प्रस्ताव राखेका छन् । बुधबार स्थायी कमिटी बैठकमा सदस्यले यसअघि उठाएका प्रश्नको जवाफ दिँदै प्रचण्डले राष्ट्रको आवश्यकता अनुसार प्रतिवेदन परिमार्जनसहित पारित गर्न कार्यदल बनाउने प्रस्ताव राखेका प्रवक्ता नारायणकाजी श्रेष्ठले जानकारी दिए ।
‘स्थायी कमिटी सदस्यका विचार, सुझाव र आलोचना सबैलाई ध्यान दिएर अयक्षद्वयको राजनीतिक प्रतिवेदन संशोधन गर्ने, त्यसको बस्तुगत आत्मगत पक्षको बारेमा समावेश गर्दै प्रतिवेदन परिमार्जनका लागि कार्यदल बनाउने प्रस्ताव राख्नु भएको छ’ बैठकपछि श्रेष्ठले भने ।
बैठकमा नेताहरुले गरेको सरकारको आलोचनाका कारण आउँदा दिनमा पार्टी सुद्धिढ र सरकार सफल रुपमा सञ्चालन गर्न सुझाव मिलेको प्रचण्डले बताएका श्रेष्ठले जानकारी दिए ।
आठ दिनसम्म चलेर आइतबारदेखि ब्रेक लागेको बैठक बुधबार पुनः बसेको हो । बुधकारको बैठकमा अध्यक्ष प्रचण्डले मात्र जवाफ दिएका छन् । बिहीबार विहान बस्ने बैठकमा अर्का अध्यक्ष केपी शर्मा ओलीले जवाफ दिनेछन् ।
पार्टी एकताको आठ महीनापछि पहिलोपटक सत्तारूढ नेकपामा गरमागरम राजनीतिक र सांगठनिक बहस भइरहेको छ । बैठक नबोलाइएको भनेर स्थायी समिति सदस्यबाट तीव्र आलोचना खेपेका अध्यक्ष ओली र दाहालले यसपटक मन फुकाएर नेताहरूलाई बोल्न दिएका छन् ।
एकतापछि पहिलोपटक भएको यो स्तरको छलफलले सत्तारूढ पार्टी र त्यसको नेतृत्वसामु धेरै प्रश्न तेर्स्याएको छ । जसको जवाफ अध्यक्षद्धवयले दिन सुरु गरेका हुन् । बैठकमा दुई अध्यक्षविरुद्ध चार शीर्ष नेता उभिएका देखिएको छ ।
प्रधानमन्त्रीसमेत रहेका पार्टी अध्यक्ष केपी शर्मा ओलीले सरकार र पार्टी सञ्चालन एकलौटी ढंगबाट गरेको आरोप लागेको छ । अर्का अध्यक्ष पुष्पकमल दाहालले मौन रहेर समर्थन गरेको आरोप चार शीर्ष नेताले लगाएका छन् ।
यी आरोप माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठले लगाएका हुन् । पार्टी र सरकार सञ्चालनमा अध्यक्षद्वयको भूमिका चित्तबुझ्दो नभएको आरोप लगाउँदै उनीहरु फरक कित्तममा देखिएका छन् ।

























