काठमाडौं। घरजग्गा कारोबारबाट सरकारले गत असारमा मात्रै रु ११ अर्ब ९४ करोड ८९ लाख ७४ हजार राजस्व उठाएको छ । यो आर्थिक वर्ष २०८२/८३ कै सबैभन्दा बढी मासिक राजस्व हो ।

भूमि व्यवस्थापन तथा अभिलेख विभागका अनुसार साउन १ गतेदेखि घरजग्गा कारोबारमा लाग्ने पुँजीगत लाभकर बढ्ने व्यवस्था बजेटमार्फत लागू हुने भएपछि असारभर किनबेच उल्लेख्य बढेको थियो । त्यसकै प्रभाव राजस्व सङ्कलनमा देखिएको विभागको तथ्यांकले देखाउँछ ।

विभागका अनुसार गत आर्थिक वर्षमा दोस्रो बढी राजस्व वैशाखमा उठेको थियो । त्यस महिनामा रु ६ अर्ब २६ करोड ३८ लाख २९ हजार राजस्व सङ्कलन भएको थियो । चैतमा रु ६ अर्ब १६ करोड ५७ लाख, जेठमा रु ५ अर्ब २४ करोड ४२ लाख, पुसमा रु ५ अर्ब १७ करोड ३२ लाख र माघमा रु ५ अर्ब ९९ लाख राजस्व उठेको थियो ।

वर्षको सुरुआती महिनामा भने घरजग्गा कारोबार अपेक्षाकृत सुस्त देखिएको थियो । साउनमा रु ३ अर्ब २८ करोड ९१ लाख, भदौमा रु ३ अर्ब १४ करोड ७ लाख, असोजमा रु २ अर्ब ७५ करोड ८५ लाख र कात्तिकमा रु २ अर्ब ७४ करोड ५१ लाख राजस्व सङ्कलन भएको विभागले जनाएको छ । मङ्सिरमा रु ४ अर्ब ८४ करोड ८१ लाख र फागुनमा रु ४ अर्ब १४ करोड ९५ लाख राजस्व उठेको थियो ।

विभागका अनुसार कर बढ्नुअघि कारोबार टुंग्याउन सेवाग्राहीको चाप बढेकाले असारमा किनबेच उल्लेख्य बढेको हो । यही कारण घरजग्गा कारोबारबाट उठेको राजस्व कोरोना महामारी र २०७२ सालको गोरखा भूकम्पपछिकै उच्च रहेको विभागको विवरणमा उल्लेख छ ।

प्रकाशित समय : ०६:१९ बजे