जापानको पश्चिमी क्षेत्रका केही इलाकामा परेको अविरल वर्षाका कारण मंगलबार बिहानसम्ममा १५६ जनाको मृत्यु भएको छ । जापान सरकारका प्रमुख प्रवक्ताले एक सय ५६ जनाको मृत्यु भएको पुष्टि गरेका हुन् ।

सोमबार बिहानसम्म मृत्यु हुनेको संख्या १०० पुगेको जापानको राष्ट्रिय टेलिभिजन प्रसारण संस्था एनएचकेले जनाएको थियो । तर, मंगलबार बिहानसम्ममा थप ५६ जनाको शव प्राप्त भएको हो ।

अविरल वर्षा र बाढीको प्रकोप केही दिनदेखि जारी रहेकोले उद्वार कार्यमा समस्या भइरहेको जनाइएको छ । यस प्रकोपमा परी अझै पनि कयौं व्यक्ति हराइरहेका छन् । मौसमविदले वर्षा अझै नरोकिने जनाएकाले पहिरोको जोखिममा रहेका स्थानबाट स्थानीय व्यक्तिलाई सुरक्षित स्थानमा लगिएको वा सर्न निर्देशन दिइएको थियो ।

हराएकाको खोजी तथा उद्धार कार्यमा हजारौं सेना तथा प्रहरी परिचालन गरिएको छ । जापानको क्योडो समाचार संस्थाले मृत्यु हुने धेरैजसो पहिरोमा पुरिएका जनाएको छ । जापानको राजधानी टोकियोदेखि ६ सय किलोमिटर पश्चिममा अवस्थित मोतोयामा नगरमा वर्षा र बाढीको प्रकोप बढेको बताइएको छ । हिरोसिमामा पनि बाढी र पहिरोको प्रकोप जारी छ ।

(रासस)

प्रकाशित समय : २२:५६ बजे