कुनै समाचार नलेखे पनि पत्रकार परिचय पत्र झुन्ड्याएर हिँड्ने ‘नक्कली पत्रकार’को कमी छैन अर्घाखाँचीमा । बरु वर्षौदेखि पत्रकारिता गरिरहेकाहरुले यस्तो गर्न नरुचाएका हुन सक्छन् । तर, समाचार लेख्नै नजान्ने र अरु पेशा व्यवसाय गर्ने कतिपयले पत्रकारले लिने सेवा सुविधा लिने र त्यही अनुसारको रजगज देखाएर हिँड्नेको संख्या ठूलै छ । फेरि गाडी वा मोटरसाइकलमा ‘प्रेस’ लेखेर हिँड्दा जिल्लातिर सानै अर्को हुने ठान्ने ‘गैर पत्रकार’ पनि उत्तिकै छन् ।

पछिल्लो समय यस्तै एउटा घटनाले अर्घाखाँचीका पत्रकारहरुको कान ठाडो पारेको छ, दृष्टि एकोहोरो बनाएको छ । घटना हो, नेपाली कांग्रेस निकट प्रेस युनियनको उपाध्यक्षमा सरकारी जागिरे व्यक्तिलाई चुनिएको विषय । उनी हुन्, प्रेस युनियन अर्घाखाँचीका निर्वतमान अध्यक्ष सूर्यप्रसाद भुषालकी श्रीमती सरिता ।

हाल उनी सन्धीखर्क नगरपालिकामा कम्प्युटर सहायक पदमा कार्यरत छिन् । दुई पटक प्रेस युनियन जिल्ला सभापति बनेका सूर्यप्रसादले पुहँचको आधारमा श्रीमतीलाई सन्धीखर्क नगरपालिकामा करारको जागिर खुवाए । यसको विरोध स्थानीय पत्रकाहरुले खुलेरै गरेका थिए सामाजिक सञ्जालमार्फत ।

अहिले फेरि उनै सूर्यप्रसादले श्रीमतीलाई प्रेस युनियनको जिल्ला उपसभापति बनाएका छन् । दुई बर्षसम्म निरन्तर सभापति बनेका सूर्यप्रसाद रेडियो रेउरालीमा कार्यरत छन् । उनकी श्रीमती पनि नगरपालिकामा जागिर खानुअघि सोही रेडियोमा कार्यक्रम प्रस्तोताको रुपमा काम गरेको बुझिएको छ ।

को को चुनिएका थिए ?
हालै सम्पन्न भएको नेपाल प्रेस युनियन अर्घाखाँची शाखाको सातौँ जिल्ला अधिवेशन तथा बार्हौँ साधारण सभाबाट अध्यक्षमा वीरेन्द्र केसी सर्वसम्मत चयन भएका थिए ।

कमिटीको खुल्ला उपाध्यक्षमा सरिता भुसाल, समावेशी उपाध्यक्षमा शान्ता खासु, सचिवमा विष्णु खनाल, सह–सचिवमा तेजेन्द्र पाण्डे र कोषाध्यक्षमा मेलिना सिंह ठकुरी चयन भएका हुन् । सदस्यहरुमा विक्रम पाण्डे, सागर महत, गिता भण्डारी, कमला घिमिरे, मदन नेपाली र भुवनेश्वर अधिकारी चयन भएका थिए ।

केन्द्रीय पार्षदमा घनश्याम पौडेल, लक्ष्मण घिमिरे र नारायण पोख्रेल चयन भए । चार जना खुल्ला र ३ जना महिला केन्द्रीय प्रतिनिधि चयन हुन बाँकी रहेको थियो । त्यस्तै प्रदेश पार्षदमा सूर्यप्रसाद भुसाल, शेषकान्त पोख्रेल, इन्द्रलाल रेग्मी, सुकदेव बेल्वासे चयन भएका छन् भने अन्य बाँकी रहेका छन् ।

प्रेस युनियनमा खैलाबैला
सूर्यप्रसादले पहुँचका भरमा आफ्नी श्रीमतीलाई प्रेस युनियनको जिल्ला उपसभापति बनाए पछि कांग्रेस निकट कतिपय पत्रकार असन्तुष्ट रहेको बताइएको छ । निर्वाचित कतिपय पदाधिकारीले पनि चित्त बुझाएका छैनन् । यो विषय अर्घाखाँचीका पत्रकारमाझ चर्चामा छ । यसले प्रेस युनियन अर्घाखाँचीभित्र खैलाबैला मच्चिएको छ ।

प्रकाशित समय : ०१:०९ बजे