अठार दिनदेखि बेपत्ता एक व्यक्ति मृत फेला
वि.सं.२०७५ पुस २ सोमवार १३:१०
shares

बेपत्ता बैतडीको दशरथचन्द नगरपालिका–३, हल्लेकका ४५ वर्षीय लक्षिराम लावड आइतबार मृत फेला परेका छन् । गत मंसिर १२ गते घरबाटै बेपत्ता भएका लावड १८ दिनपछि घरनजिकैको इरानखोलामा मृत फेलापरेका हुन् ।
स्थानीय बासिन्दाले लावडको शव देखेपछि प्रहरीलाई खबर गरेका थिए । शव कुहिएको अवस्थामा रहेकाले केही दिनअगाडि नै मृत्यु भएको हुनसक्ने जिल्ला प्रहरी कार्यालय बैतडीका प्रहरी नायब उपरीक्षक नेत्रमणि गिरीले जानकारी दिए । मानसिक सन्तुलन ठिक नरहेका लावड बेपत्ता भएपछि आफन्तले खोजी गरिदिन प्रहरीमा निवेदन दिएका थिए ।
लावडको शव पुरै कुहिएको अवस्थामा रहेकोले परीक्षण नगरी आफन्तको जिम्मा लगाइएको जिल्ला प्रहरी कार्यालय बैतडीले जनाएको छ ।

























