नेपाली कांग्रेसका सभापति शेरबहादुर देउवाले राष्ट्र बैंकको गभर्नर चाँडै नियुक्ति हुने बताएका छन् । आज बुढानीलकण्ठमा बसेको पार्टीको पदाधिकारी र पूर्वपदाधिकारीको बैठकमा सभापति देउवाले राष्ट्र बैंकमा गभर्नर नियुक्तिको विषय ढिलो भएको पदाधिकारीको गुनासोपछि अब छिट्टै नियुक्ति हुने बताएका हुन् ।

बैठकपछि सञ्चारकर्मीहरूसँगको कुराकानीमा पार्टीका प्रवक्ता डा. प्रकाशशशरण महतले सभापति देउवाको भनाइ उद्धृत गर्दै भने, ‘राष्ट्र बैंकको विषय यो निकै ढिलो भएको छ भन्ने चासो प्रकट भयो । नेतृत्वले, सभापतिज्यूले यो चाँडै टुङ्गिन्छ भन्नुभएको छ ।

प्रोफेसनल, व्यावसायिक र राष्ट्र बैंकको नेतृत्व यस्तो व्यावसायिक व्यक्तित्वको हातमा जानुप-यो जसले मौद्रिक र वित्त नीतिलाई समन्वयात्मक ढंगबाट अगाडि बढाउन सकोस् ।

त्यसको चाँडो निर्णय हुन्छ र एउटा सहमतिबाट निर्णय हुन्छ भन्ने कुरा पनि उहाँले राख्नुभएको छ ।’ गत चैत २४ गते १७ औं गभर्नर महाप्रसाद अधिकारीको कार्यकाल सकिएपछि हालसम्म केन्द्रीय बैंक गभर्नरविहीन छ ।

गभर्नर नियुक्तीका लागि एमाले र कांग्रेस भागबन्डामा फसेर दिन घर्किंदै जाँदा अर्थतन्त्र सुधार्न तत्काल गर्नुपर्ने नीतिगत निर्णय पनि थाँती बसेका छन् ।

प्रकाशित समय : १४:४९ बजे