महिला हिंसाका घटनामा कमी नआएको भन्दै नेपाल महिला संघले सरकारको ध्यानाकर्षण गरेको छ । संघको उपत्यका समितिले संयुक्त ज्ञापनपत्र जारी गर्दै काठमाडौंका प्रमुख जिल्ला अधिकारीमार्फत सरकारको ध्यानाकर्षण गरेको हो ।

कञ्चनपुरकी निर्मला पन्त बलात्कारपछिको हत्या प्रकरणपछि देशका विभिन्न जिल्लामा बलात्कार, हत्या, हिंसा, अराजकता, दण्डहिनता र आकासिँदो महँगीविरुद्ध संघको ध्यानाकर्षण भएको ज्ञापनपत्रमा उल्लेख छ । ‘८ महिनाका शिशुदेखि ७० वर्षसम्मका महिलामाथि भएका बलात्कारका घटनामा वृद्धि भइरहँदा पनि वर्तमान सरकारको गम्भीर ध्यान नजानु दुर्भाग्यपूर्ण हो,’ पत्रमा लेखिएको छ ।

यस्ता जघन्य अपराधिक घटनाहरु भइरहँदा सरकार संवेदनशील नभएको भन्दै संघले ध्यानाकर्षण गराउँनुपरेको बताएको छ । बलात्कार तथा हत्या रोक्न र दोषी पहिचान गर्न तथा आम नागरिकको सुरक्षा प्रत्याभूति गराउन संघले सरकारसँग माग गरेको छ ।

प्रकाशित समय : ०२:१४ बजे