कञ्चनपुरकी १३ वर्षीया बालिका निर्मला पन्तको बलात्कारपछि हत्या गर्नेलाई कारबाहीको माग गर्दै देशभर विशाल प्रदर्शन भएको छ । निर्मलाको हत्या भएको ५२ दिनसम्म पनि दोषी पक्राउ नगरिएको भन्दै सरकारलाई दबाब दिन देशभर प्रदर्शन र नागरिक सभा गरिएको हो ।

‘निर्मलाका निम्ति न्याय’ नाम दिएर प्रदर्शन सुरू भएको छ । काठमाडौंको माइतिघरमा दिउँसो १ बजेदेखि प्रदर्शन भइरहेको छ ।

सामाजिक सञ्जाल फेसबुक र ट्विटरमा पनि युवाहरुले ‘निर्मलालाई न्याय देउ’ भन्दै अभियान नै चलाएका छन् । सामाजिक सञ्जालमा पनि सरकारले हत्यारा पक्राउ नगरेको भन्दै सरकारको आलोचना भइरहेको छ ।

निर्मलाका बाब आमा पनि न्याय खोज्दै काठ्माडौंमा छन् । एकसातादेखि काठमाडौंमा रहेका बुबा यज्ञ पन्त र आमा दुर्गादेवी पन्तले शुक्रबार गृहमन्त्री रामबहादुर थापालाई भेटेर दोषीलाई कारबाही गरी छोरीलाई न्याय दिन माग गरेका छन् ।

जवाफमा गृहमन्त्री थापाले अनुसन्धान अन्तिम चरणमा पुगेकाले छिट्टै अपराधि सार्वजनिक गर्ने आश्वासन दिएका थिए । निर्मलाका बुबा-आमाले राष्ट्रपति विद्यादेवी भण्डारी र प्रधानमन्त्री केपी ओलीलाई पनि भेट्ने बताएका छन् । निर्मलाको गत साउन १० गते बलात्कारपछि हत्या भएको थियो ।

प्रकाशित समय : २०:१३ बजे