प्रहरीमा जागीर लगाइदिन्छु भन्दै ठगी गर्ने एक भूतपूर्व प्रहरी फन्दामा परेका छन् ।

दाङको घोराही बजारमा मेट्रो सिटी सेक्युरिटी कम्पनी सञ्चालन गर्दै आइरहेका भूतपूर्व प्रहरी कालीबहादुर लामालाई प्रक्राउ गरी आइतबार सार्वजनिक गरिएको हो ।

दोलखा भीमेश्वर नगरपालिका–२ चरिकोट घर भई काठमाडौँ पेप्सीखोला बस्दै आएका ५१ वर्षीय लामालाई काठमाडौँबाट दाङ प्रहरीसहित सीआईबीको टोलीले पक्राउ गरेको हो । अभियुक्त लामाले करीब ६०/७० जनासँग जनही दुई लाख ५० हजार रूपैयाँसम्म लिएको खुल्न आएको प्रहरीले जनाएको छ ।

जिल्ला प्रहरी कार्यालय दाङका प्रहरी प्रमुख कृष्णहरि शर्माका अनुसार सल्यानका पीडित भीमसेन भण्डारीले प्रहरीमा उजुरी दिएपछि लामाको ठगी गतिविधि खुल्न आएको छ ।

हतियारसहित पक्राउ

जिल्ला प्रहरी कार्यालय दाङले हतियारसहित एक व्यक्तिलाई पक्राउ गरेको छ । यूसए लेखिएको अटोमेटिक पेस्तोलसहित घोराही–१३ बडहराका २७ वर्षीय वीरबहादुर चौधरीलाई पक्राउ परेका हुन् । चौधरीको साथबाट पेस्तोलसँगै एक थान म्याग्जिन र चार राउण्ड गोलीसमेत फेला परेको छ ।

प्रकाशित समय : १३:२२ बजे