चौथो संविधान दिवसको औपचारिक कार्यक्रमका लागि काठमाडौं महानगरपालिकाले तयारी पूरा गरेको छ ।

यस वर्ष सर्वसाधारणले पनि सहजतापूर्वक समारोह हेर्न पाउने व्यवस्था मिलाइएको महानगरपालिकाले जनाएको छ । यसअघिका वर्षमा विशिष्ट व्यक्तिका लागि मात्र बस्ने व्यवस्था मिलाइएको हुन्थ्यो । महानगरका सहप्रवक्ता नवराज ढकालका अनुसार सर्वसाधारणका लागि बस्ने कुर्सी, पिउने पानी, र स्वास्थ्योपचार केन्द्र राखिने छ । तीन हजार सर्वसाधारणका लागि र विशिष्ट व्यक्तिका लागि दुई हजार कुर्सी राखिएको ढकालले जानकारी दिए ।

समारोहमा पुष्पवृष्टि गरिनुका साथै सांस्कृतिक झाँकी प्रदर्शन गरिने बताइएको छ । कार्यक्रम अवधिभर दमकल, एम्बुलेन्सलगायत आवश्यक सेवा तैनाथ हुनेछन् ।

प्रकाशित समय : २३:२६ बजे