बुटवल उपमहानगरपालिकाले पहिलो वर्षलाई अध्ययनका रुपमा लिँदै अब समृद्धिको आधार वर्षका रुपमा महत्वपूर्ण कामहरु अगाडि बढाएको बताएको छ । मंगलबार उप–महानगरपालिकामा पत्रकार भेटघाट कार्यक्रम गर्दै उपमहानगरपालिकाले ५ वर्षे आवधिक तथा १५ वर्षे दीर्घकालीन विकास गुरुयोजना तयार गरेको सार्वजनिक गरेको छ ।

गुरुयोजना निर्माणको निम्ति विज्ञ समूह, विषयगत विज्ञ उपसमूह, निर्देशक समिति र सल्लाहकार समिति गठन गरेर वडावासीहरु र विभिन्न सरोकारवाला निकायहरुसँग सुझाव संकलनसमेत गरिएको प्रमुख शिवराज सुवेदीले जानकारी दिए ।

‘यो चरण सँगै विभिन्न विषयगत समितिहरुमा छलफल गर्ने काम सम्पन्न गर्दै तेस्रो नगरसभाबाट बुटवल उपमहानगरपालिकाको एकीकृत विकास गुरुयोजना पारित गरिएको छ ।’ प्रमुख सुवेदीले नगर प्रोफाइल पाश्र्वचित्र निर्माण गर्ने काम समेत सम्पन्न भएको बताए ।

हिलपार्कमा विशाल बुद्ध मूर्ति साथै बुद्धिस्ट पार्क निर्माणका लागि सर्भे तथा जग्गा यकिन गर्ने काम सम्पन्न गर्दै डिपिआर तयार पार्ने काम भइरहेको नगरप्रमुख सुवेदीले बताए । यो बुद्धमूर्ति लुम्बिनीको मायादेवी मन्दिर परिसरबाटसमेत देख्न सकिने गरी डिजाइन भइरहेको बताइएको छ ।

यस्तै शिवनगर सामुदायिक बनमा रामपिथेकस जियोलोजिकल पार्क बनाउन सर्भे तथा जग्गा एकिन गर्ने काम भईरहेको छ । मिलनपार्कको विकासका लागि गुरुयोजना निर्माण गर्दै पूर्वाधार निर्माणको काम सुरु भएको छ ।

तत्कालीन अंग्रेज सेनालाई पराजित गरेको जितगढी किल्लामा कर्णेल उजिरसिंहको पूर्ण कदको शालिक बनाइएको भएको छ । जितगढी किल्लामा विशाल राष्ट्रिय झण्डा फहराउने गरी डिजाइन भइरहेको प्रमुख सुवेदीले बताए । यो कामको डिजाइन तयार पारी निर्माण कार्यका प्रक्रिया अगाडि बढाइएको छ । विभिन्न विज्ञहरुसंगको अन्तरक्रिया र छलफल मार्फत ऐतिहासिक धरोहर जितगढी किल्लाको संरक्षण र प्रर्वद्धन गर्न कार्यपालिकाको बैठकबाट बैशाख ७ गतेलाई जितगढी विजयोत्सवका रुपमा मनाउने निर्णय गरीएको साथै जितगढी किल्लाको बारेमा पर्चा निर्माण गरी वितरण भईरहेको छ ।

बुटवल उपमहानगर वडा नम्बर १ र २ लाई पुरातात्विक बस्तीको रुपमा विकास गर्र्न र बुटवल १ मा अवस्थित पुरानो नपा भवन भएको स्थानमा बटौली संग्रहालय निर्माण गरिने भएको छ । यो कामका लागि डिपिआर तयार पार्ने काम अगाडि बढाइएको छ । हिलपार्कमा जनजाति संग्रहालय र मोतिपुरमा थारु संग्रहालय निर्माणका लागि गुरुयोजना निर्माण गर्ने काम अगाडि बढाइएको प्रमुख सुवेदीले बताए । बुटवलको खास पहिचान नै पारि बुटवल (वडा १ र २ का क्षेत्र) मानिन्छ ।
पशुपतिनाथको महिमासँग जोडिएको सेमलारको नरैनापुर धाम र त्यसक्षेत्रको ताललाई जोडेर विशेष पर्यटकीय क्षेत्र बनाइने भएको छ ।

नरेनापुर भ्यू टावर निर्माण, पार्क निर्माण साथै सिमसार क्षेत्रको रुपमा विकास गर्ने अवधारणाको डिपिआर तयार पार्ने काम भइरहेको । साथै पार्क संरक्षणका लागि कम्पाउण्ड वाल निर्माण गर्ने काम भएको प्रवक्ता रामप्रसाद रेग्मीले जानकारी दिए ।

नुवाकोट र बसन्तपुरलाई बुटवलको हिल स्टेशनका रुपमा विकास गर्न निजि क्षेत्रको सहकार्यमा केबलकारको अवधारणा अगाडि बढाइएको छ । यसका साथै तिनाउ गाउपालिकाको सहकार्यमा विकास योजना तयार पार्ने काम भईरहेको बुटवल उपमहानगरले जनाएको छ ।

डिजिटल प्रणालीबाट बुटवल उपमहानगरपालिका क्षेत्रभित्रका करिब ४०,००० भन्दा बढी घरहरुको डिजिटल प्रविधिमा आधारित घर नम्बरि गर्ने काम सम्पन्न भएको छ । निर्माण सामग्रीको गुणस्तर परीक्षणका लागि आवश्यक उपकरणहरुको खरिद गरी प्रयोगशाला निर्माण गर्ने काम भइरहेको छ ।

अव्यवस्थित बसोबासलाई व्यवस्थित गर्र्न अव्यवस्थित बसोबास व्यवस्थापन तथा सार्वजनिक जग्गा संरक्षण कार्यदल गठन गर्दै करिब १६ हजार घरघुरीको लगत संकलन गरी अमिन मार्फत नापजाँच गर्ने प्रक्रिया अगाडि बढाईएको छ ।

जवई खेल मैदानलाई फुटबल रंगशालाको रुपमा विकास गर्न डिपिआर सम्पन्न गरी निर्माण कार्य अगाडि बढाइएको छ । यो खेलमैदानका लागि उपमहानगरपालिकाले प्रदेश सरकारसँग समेत समन्वय गरिरहेको छ । प्रदेश सरकारले प्रदेश स्तरको एउटा खेल मैदान बुटवलमा पनि बनाउने घोषणा गरेको थियो । उपमहानगरले यही मैदानलाई बनाउन प्रस्ताव गरेको छ ।

यस्तै सिद्देश्वर, तामनगर, नहरपुर र सेमलार गरी ६ वटा खेलमैदान सम्याउने, फिलिङ्ग गर्ने, तारबार गर्ने, पर्खाल लगाउने र मैदानको वरीपरी हिडँडुल गर्न ट्रयाक बनाउने काम भएको छ । सेमलारमा आधुनिक कर्वडहल निर्माण र नगरका अन्य वार्डहरुमा स–साना खेलमैदानहरुलाई स्त्तरोन्नती गर्ने काम भईरहेको उपमहानगरपालिकाले जनाएको छ ।

७० वर्ष उमेर पुरा भएका ज्येष्ठ नागरिक, अपाङ्गता भएका नागरिक र एकल महिला गरेर कूल ७,२७४ जना लाभग्राहीहरुलाई जनही दुई हजारका दरले चाडपर्व खर्च वितरण गर्नुका साथै ५ बर्ष मुनिका दलित बालवालिकालाई पोषण प्रोत्साहन कार्यक्रम अन्र्तगत जनही दुई हजार प्रदान गर्ने काम सम्पन्न भएको छ ।

जेष्ठ नागरिक परिचयपत्र र सामाजिक सुरक्षा परिचयपत्र सम्बन्धित वडाबाट वितरण गर्नेे, एकल महिलाहरुको तथ्यांक संकलन गर्ने, अपागं मैत्री सहर बनाउन अपाङ्गता भएका व्यक्तिहरुको तथ्याङ्क संकलन गरी कार्ययोजना निर्माण गर्ने र लैङ्गिक हिंसा मुक्त बुटवलको कार्ययोजना निर्माण गर्ने काम सम्पन्न गर्नुका साथै जेष्ठ नागरिक सम्मान कार्यक्रम अन्र्तगत ११ व्यक्तिहरुलाई ह्वीलचेयर र २० जनालाई सेतो छडी प्रदान गर्ने काम सम्पन्न भएको छ ।

प्रकाशित समय : ०२:०८ बजे