व्यापारिक समूहका रुपमा रहेको अग्नि ग्रुपले सञ्चालनको ३० वर्ष पूरा गरेको छ । ग्रुपले विभिन्न कार्यक्रम आयोजना गरी आफ्नो ३०औं वाषिकोत्षव मनाएको हो ।

साे अवसरमा ग्रुपले ३० जना विद्यार्थीलाई उच्च शिक्षाका लागि छात्रवृत्ति प्रदान गरेको छ । ग्रुपले यस वर्ष एसई ई उत्तीर्ण गरेकामध्ये ३० जनालाई उदय छात्रवृत्ति पुरस्कार हस्तान्तरण गरेको हो । कार्यक्रममा अग्नि ग्रुपका प्रबन्ध निर्देशक क्याबिनेट श्रेष्ठले कम्पनीका सबै सरोकारवालालाई निरन्तर सहयोग र साझेदारीका लागि धन्यवाद दिए ।

‘अग्नि ग्रुपले सन् १९९१ मा महिन्द्रा युटिलिटी गाडी तथा ट्रयाक्टरको अधिकृत वितरकको रूपमा आफ्नो सञ्चालन आरम्भ गरेको थियो । आज अग्नि ग्रुप अटोमोबाइल्स, स्पेयर्स र सेवाहरूको प्रिमियम बिक्रेता हो र यो मापन र क्षमतामा अतुलनीय छ । देशभरका ७१ भन्दा अधिक डिलर तथा शाखाहरू सहित यसको बृहत नेटवर्क छ । कम्पनीले लजिस्टिकदेखि वित्तीय क्षेत्रसम्मका अन्य उद्यममा विविधीकरण गरेको छ र हाल यस समूहअन्तर्गत १० भन्दा बढी कम्पनीहरू सञ्चालनमा छन्,’ श्रेष्ठले थपे ।

कार्यक्रममा उदय छात्रवृत्ति पुरस्कार हस्तान्तरण पनि गरिएको थियो । कम्पनीले यस वर्ष एसइई उत्तीर्ण गरेका ३० जना विद्यार्थीलाई उच्च शिक्षाका लागि छात्रवृत्ति प्रदान गरेको छ । ‘हरेक वर्ष हामी २५ जना विद्यार्थीलाई पुरस्कार वितरण गर्छौं तर यस वर्ष हामीले ३० जना विद्यार्थीलाई हाम्रो ३० वर्षे उत्सवका लागि छानेका हौं । हामी योग्य विद्यार्थीहरुलाई अवसर प्रदान गर्न प्रतिवद्ध छौं र आगामी दिनमा पनि यो पुरस्कारलाई निरन्तरता दिनेछौं,’ अग्नि ग्रुपका नायब-निर्देशक बरदान बस्नेतले भने ।

अग्नि ग्रुपको सञ्चालक समिति, महिन्द्रा ग्रुपका प्रतिनिधिहरुका साथै खेलकुद, संगीत र चलचित्र क्षेत्रका चर्चित व्यक्तित्वहरूको उपस्थितिमा कार्यक्रम सम्पन्न भएको हो ।

प्रकाशित समय : २०:०६ बजे