इलाम । सूर्योदय नगरपालिका–८ कजेनीका दिनेश महतले व्यावसायिक गाईपालनबाट राम्रो आम्दानी गर्दै दुई जना स्थानीय युवालाई रोजगारीसमेत दिएका छन ।

चार वर्षअघि ३० लाख लगानीमा ‘बिएण्डएम कृषि तथा पशुपालन फार्म’ सञ्चालन गरेका महतको फार्ममा हाल १० माउ गाई छन् । तीमध्ये पाँच दुहुना र पाँच वटा चाँडै बियाउने स्थितिमा छन् । फार्ममा १४ बाच्छी पनि हुर्किरहेका छन् ।

उनले दैनिक ५० देखि ६० लिटर दूध उत्पादन गरी प्रतिलिटर ५५ देखि ६० सम्ममा नजिकैको सहकारीमा बिक्री गर्दै आएका छन । दूध बिक्रीबाट वार्षिक करिब ११ लाख आम्दानी हुने उनले बताए । लगानीअनुसार दूधको मूल्य कम पाएको उनको गुनासो छ ।

गाईपालनबाट स्वरोजगार बनेका महतले फार्ममा दुई युवालाई खानबस्न सुविधासहित मासिक १८ हजार तलब दिएर रोजगारी दिएका छन। फार्म सञ्चालनका लागि ३० रोपनी जमिनमा सुपर नेपियर, अम्रिसो तथा अन्य प्रजातिका घाँस लगाएका छन ।

गाउँमै बसेर विदेशमा भन्दा राम्रो आम्दानी गर्न सकिने सन्देश दिन आफूले व्यावसायिक कृषि तथा पशुपालन रोजेको महत बताउछन। युवालाई स्वदेशमै स्वरोजगारी गर्न प्रेरित गर्नुपर्नेमा उनको जोड छ ।