हमासको सैन्य शाखा अल–कासाम ब्रिगेड्सले दक्षिणी गाजा पट्टीमा भएको इजरायली हवाई आक्रमणमा आफ्ना एक वरिष्ठ सैन्य कमाण्डर मारिएको पुष्टि गरेको छ । ब्रिगेड्सले आइतबार एक विज्ञप्ति जारी गर्दै उक्त जानकारी दिएको हो ।

विज्ञप्तिमा अल–कासाम ब्रिगेड्सको सामान्य सैन्य परिषद्का सदस्य तथा राफाह ब्रिगेडका कमाण्डर ५३ वर्षीय समीर महमुद अबु युनिसको मृत्यु भएकोमा शोक व्यक्त गरिएको छ । कमाण्डरलाई शनिबार र आइतबारबीचको रातमा मारिएको विज्ञप्तिमा उल्लेख छ ।

विज्ञप्तिका अनुसार, अल–कासाम ब्रिगेड्सको पहिलो पुस्ताका सदस्य अबु युनिस सन् १९९१ मा समूहमा आबद्ध हुनुभएको थियो । उहाँ यसअघि इजरायली जेलमा समेत पर्नुभएको थियो ।

अक्टोबर ७ को आक्रमणको योजना बनाउन र त्यसको नेतृत्व गर्न अबु युनिसले महत्वपूर्ण भूमिका खेलेको पनि विज्ञप्तिमा उल्लेख छ ।

यसैबीच, इजरायली सेनाले पनि शनिबार राति दक्षिणी गाजा पट्टीमा गरिएको आक्रमणमा अबु युनिस मारिएको जनाएको छ । इजरायली रक्षा बल (आईडीएफ) र इजरायली सुरक्षा एजेन्सी (आईएसए) ले संयुक्त रूपमा गरेको आक्रमणमा युनिसलाई निशाना बनाइएको सेनाको विज्ञप्तिमा उल्लेख छ ।

इजरायली सेनाका अनुसार, अबु युनिसले राफाह ब्रिगेडका लडाकुलाई इजरायली नागरिक तथा सैनिकविरुद्ध आक्रमण गर्न निर्देशन । साथै, युद्धका क्रममा ठूलो क्षति बेहोरेको उक्त ब्रिगेड र हमासको सैन्य क्षमता पुनः सुदृढ पार्न पनि उनको संलग्न थियो ।

यसअघि प्यालेस्टिनी स्थानीय तथा स्वास्थ्य स्रोतहरूले खान युनिसको पश्चिममा पर्ने अल–मावासी क्षेत्रमा एउटा पाललाई लक्षित गरी गरिएको इजरायली हवाई आक्रमणमा अबु युनिस मारिएको बताएका थिए ।