प्रधानमन्त्री शेरबहादुर देउवाले नेपाल बार एशोसिएशन र सर्वाेच्च अदालत बार एशोसिएशनसँग छलफल गर्ने भएका छन् । प्रधानन्यायाधीश चोलेन्द्रशमशेर राणाविरुद्ध आन्दोलन चर्काइरहेका नेपाल बार र सर्वोच्च बारका पदाधिकारीसँग छलफल गर्न देउवाले शुक्रबार वालुवाटार बोलाएको नेपाल बारका महासचिव लीलामणि पौडेलले बताए ।

प्रधानमन्त्रीलाई भेट्न दुवै बारका पदाधिकारी तथा वरिष्ठ अधिवक्ता बद्रीबहादुर कार्की, हरिहर दाहाल, शम्भु थापा र रमण श्रेष्ठ सहितको टोली वालुवाटार जाने भएको छ ।

प्रधानन्यायाधीश जबरालाई अवज्ञा गर्दै सर्वोच्चका १९ न्यायाधीशले इजलास बहिष्कार गरिरहेका छन् भने एक महिनादेखि नेपाल बारमा आबद्ध कानुन व्यवसायीहरू आन्दोलनमा छन् । सत्तारूढ गठबन्धनको कात्तिक ३० को बैठकले न्यायालयको विवादमा उचित निकास न्यायालयभित्रबाटै यथाशक्य दिनुपर्ने निर्णय गरेको थियो । न्यायालयमा देखिएको विवादबारे संवैधानिक परिषद्का अध्यक्ष तथा प्रधानमन्त्री देउवा मौन रहेको भन्दै नागरिक समाज र बारले आलोचना गर्न थालेपछि प्रधानमन्त्री छलफलका लागि तयार भएको हुन् ।

भेटमा प्रधानन्यायाधीश राणा पदमुक्त हुनुपर्ने १७ कारण उल्लेख गर्दै संघीय संसद्मा प्रतिनिधित्व गर्ने दललाई गत सोमबार बुझाएको धारणापत्र बारले शुक्रबार प्रधानमन्त्रीलाई पनि बुझाउनेछ ।