आगामी पुस पहिलो साता हुने कुमारी बैंक काठमाडौं टिम च्याम्पियनसीप २०२१ कर्पोरेट आमन्त्रण ब्याडमिन्टनमा सहभागी हुने नेपाली खेलाडीहरुको नाम सार्वजनिक गरिएको छ । प्रतिायेगिातको आयोजक काठमाडौं ब्याडमिन्टन एकेडेमीले बुधबार एक पत्रकार सम्मेलनको आयोजना गरि नेपाली खेलाडीको नाम सार्वजनिक गरेको हो ।

एकेडेमीले वरियताका आधारमा शिर्ष ८ मा पर्न सफल खेलाडीको नाम सार्वजनिक गरेको छ । प्रतियोगितामा सहभागी हुने खेलाडीमा पुरुषतर्फ त्रिभुवन आर्मी क्लबका रत्नजित तामाङ, एपीएफका दिपेश धामी, भोजपुरका विकास श्रेष्ठ, एपीएफका साजन ताम्राकार, नेपाल पुलिसका विष्णु कटुवाल, धादिङका सुदिप सेढाई, नेपाल पुलिसका दिपक बोहरा र आर्मीका नविन श्रेष्ठ रहेका छन् ।

यस्तै महिलातर्फको शिर्ष आठमा पर्न सफल खेलाडीहरुमा क्रमशः नङशल तामाङ, अमिता गिरी, अनुमाया राई, रशिला महर्जन, एपीएफका जेसिका गुरुङ, शोभा गौचन, एपीएफकै सुनैना मुखिया, भोजपुरकी सिता राई रहेकी छन् । तर जेसिका र सिताले प्रतियोगितामा सहभागिता नजनाउने भएपछि नवौ वरियताकी मोरङकी सिमा राजवंशी र दशौ वरियताकी बाँकेकी सम्झना शर्माले प्रतियोगिता खेल्ने भएका छन् ।

प्रतियोगिता पुस ६ देखि ९ गतेसम्म त्रिपुरेश्वरस्थित राखेप कभर्ड हलमा हुनेछ । खेलाडीहरुले खेल्ने टोलीको घोषणा भने पछि हुने आयोजकले जनाएको छ । लैंगिक समानतालाई ध्यानमा राख्दै पुरुष तथा महिला खेलाडीहरुलाई समान पुरस्कारको ब्यवस्था गरेको एकेडेमीका महासचिव एवं नेपाल ब्याडमिन्टन संघका सदस्य एवं अन्तराष्ट्रिय अम्पायर दीपक थापाले बताए ।

लिग कम नक आउटका आधारमा खेलिने प्रतियोगितामा १६ टिमहरुको सहभागिता रहनेछ । प्रतियोगितामा मेन्स् डबल, वुमन्स् डबल, कर्पोरेट डबल्स, मेन्स् सिंगल्स, वुमन्स् सिंगल्स गरी पाँच स्पर्धा समावेश गरिएको छ । विजेता टिमका वरियता प्राप्त खेलाडीले ७५ हजार, उपविजेता टिमका खेलाडीले ६० हजार, तेस्राेले ५५ हजार र चौथोले ४७ हजार ५ सय प्राप्त गर्नेछन् । यस्तै टिम च्याम्पियनलाई रनिङ ट्रफी प्रदान गरिनेछ भने पहिलो, दोश्रो, तेश्रो हुने खेलाडीहरुले मेडल तथा गिफ्ट ह्याम्पर प्राप्त गर्नेछन् ।

प्रत्येक खेलबापत थप २५ सय प्रदान गरिने छ । यसरी एक खेलाडीले समूह चरणबाटै बाहिरेता पनि ३५ हजार प्राप्त गर्ने आयोजक एकेडेमीका महासचिव थापाले जानकारी गराए । आयोजकका अनुसार प्रतियोगिता सञ्चालनका लागि ४९ लाख ४६ र पुरस्कारतर्फ ८ लाख रुपैयाँ लाग्ने अनुमान गरिएको छ ।

प्रकाशित समय : १८:०३ बजे