नेपालले चौथो महिला टी२० आई सिरिजमा भ्रमणकारी युगान्डालाई पराजित गरेको छ । सुरुआती तीन खेल लगातर गुमाएकाे नेपालले शुक्रबार युगान्डाविरूद्ध १५ रनकाे जित निकालेकाे हाे ।

जितको लागि ९८ रनको मध्यम विजयी लक्ष्य पछ्याएको युगान्डा निर्धारित १८ ओभरमा ८ विकेट गुमाउँदै ८२ रनमा समेटियो । युगान्डाकी जेनेत म्वाबाजीले ३२ बलमा १ चौका प्रहार गर्दै सर्वाधिक २१ रन बनाइन् । एभलिन एनीपो ११ बलमा २ चौकासहित १६ रन बनाइन् ।यता, रिता न्यांगेन्डो १६ र ओपनर केविन एविनो ११ रन आउट भइन् ।

नेपालको लागि डेब्यू खेल खेलेकी युवा स्पिनर हिरान्माय रोयले ३ ओभरमा ११ रन खर्चेर २ विकेट लिइन् । अस्मिना कर्माचार्य, कविता कुँवर र रुविना क्षेत्रीले १/१ विकेट लिए । त्यसअघि नेपालले १७.५ ओभरमा अलआउट हुँदै ९७ रन बनाएको थियो । वर्षका कारण आउट फिल्ड भिजेपछि खेल निर्धारित समयभन्दा आधा घण्टा ढिलो सुरु भएको थियो ।

१८ ओभरको खेलमा नेपालका लागि ओपनर ज्योति पाण्डेले सर्वाधिक १७ रनको इनिङ्स खेलिन् । उनले १३ बलमा ४ चौका प्रहार गरिन् । विन्दु रावलले ३५ बलमा १ चौकासहित १६ रन बनाइन् । सीता रानामगर ८ बलमा २ चौकासहित ११ रनमा रन आउट भइन् । युगान्डाकी कोन्सी कोन्सी एविकोले ४ ओभरमा १३ रन खर्चेर ३ विकेट लिइन् ।

५ खेलको सिरिज युगान्डाले ३-० ले जितिसकेको छ । नेपाल पहिलो खेलमा १२ रनले पराजित भएको थियो । यस्तै, दोस्रोमा नेपाल १ विकेटले पराजित भएको थियो । बिहीबार युगान्डाले नेपाललाई ६ विकेटले हराएको थियो । नेपालले युगान्डासँग शनिबार अन्तिम टी२० आई खेल खेल्न खेल्नेछ ।