महानगरीय ट्राफिक प्रहरी महाशाखाले जथाभावी पार्किङ गर्ने सवारी साधनलाई कारवाही गर्ने विशेष अपरेशनलाई आज पनि निरन्तरता दिएको छ । आज ललितपुरको पाटन क्षेत्रमा जथाभावी सडक तथा फुटपाथमा पार्किङ गरेका सवारी साधनहरूलाई हटाउन स्वीप अपरेशन चलाएको हो ।

महाशाखाका प्रमुख एसएसपी उमेश राज जोशीले सडक तथा फुटपाथ अतिक्रमण गरी अनाधिकृत रूपमा पार्किङ गर्ने जुनसुकै प्रकारका सवारी साधनलाई कारवाहीको दायरामा ल्याउन यो अभियान सञ्चालन गरेकाे बताएका छन् । यसले आम सडक प्रयोगकर्ताहरूलाई सडक तथा फुटपाथको निर्वाध प्रयोग गर्न र सवारी आवागमनमा समेत सहजता ल्याउने विश्वास लिएकाे एसएसपी जोशीले बताए । उनले 'नो पार्किङ' जोन र अन्य सवारी आवागमनलाई असर गर्ने गरी पार्किङ गरेका सवारी साधनलाई हटाउने यस अभियानलाई थप प्रभावकारी बनाइने समेत बताए ।

उनका अनुसार आज ललितपुरको पाटन एरियामा ३७ सवारी साधनलाई कारवाही गरिएकाे छ । ट्राफिक प्रहरीले अनाधिकृत स्थानमा पार्किङ गर्ने त्यस्ता सवारी चालकहरूलाई कारवाही गर्नुका साथै जथाभावी आवागमनमा असर गर्ने गरी पार्किङ नगर्न समेत सचेत गराएको छ । बौद्ध एरियामा गरिएको स्वीप अपरेशनमा आज १०० सवारी साधनलाई कारवाही गरिएको छ भने आसपासका अन्य सडकहरूमा पार्किङ व्यवस्थापन समेत गरिएको महाशाखाले जनाएको छ ।

करिडोर सडकहरूमा हुने सवारी तथा पार्किङ व्यवस्थापन गर्न ट्राफिक महाशाखाले हालसालै डल्लु र मैतीदेवीमा नयाँ ट्राफिक पोष्टसमेत स्थापना गरिसकेको छ । महाशाखाले सम्पूर्ण सवारी चालकहरूलाई सवारी आवागमनमा असर पर्ने गरी अनाधिकृत स्थानमा पार्किङ नगर्न विशेष अनुरोधसमेत गरेको छ ।