चितवन । चितवनमा उत्पादित सयपत्री र मखमली फूल तथा फूलका माला विदेश निर्यात हुन थालेका छन् । पूर्वी चितवनको कालिका नगरपालिका–पदमपुरका चार दाजुभाइले व्यावसायिक रूपमा उत्पादन गरेको फूल तथा माला बेलायत, हङ्कङ र दुबईसम्म पुग्न थालेको हो ।

स्थानीय गोविन्द बाँस्तोलाको परिवारले उत्पादन गरेका सयपत्री र मखमलीका माला तथा फूलका थुङ्गा विभिन्न देशमा पठाएको छ । बाँस्तोलाका अनुसार तीन हजार सयपत्री र दुई हजार मखमलीका माला हङ्कङ निर्यात गरिएको छ । त्यस्तै, विशिष्ट व्यक्तिका लागि तयार गरिएका ५०० वटा विशेष माला र ५०० किलो सयपत्री फूलका थुङ्गासमेत हङ्कङ पठाइएको छ ।

यसैगरी, एक हजार सयपत्रीका माला र एक हजार किलो फूलका थुङ्गा दुबई तथा ५०० वटा मखमलीका माला बेलायत निर्यात गरिएको बाँस्तोलाले जानकारी दिए । ती देशमा रहेका नेपाली व्यवसायीले चितवनबाट फूल तथा माला खरिद गरी लगेका हुन् ।

सात वर्षअघि पाँच कठ्ठा जमिनबाट सुरु गरिएको फूलखेती अहिले विस्तार भएर १० बिघामा पुगेको छ । जसमध्ये पाँच बिघामा तिहारलाई लक्षित गरी फूलखेती गरिएको छ भने बाँकी जमिनमा बेमौसमी फूल उत्पादन हुँदै आएको छ ।

बाँस्तोलाका अनुसार उत्पादित माला नेपाली बजारमा प्रतिगोटा ८० रुपैयाँ र विदेशमा १०० रुपैयाँमा बिक्री हुने गरेको छ । कोरोना महामारीका कारण रोजगारी गुमेपछि सुरु गरिएको फूलखेती अहिले परिवारको राम्रो आम्दानीको स्रोत बनेको छ । यस व्यवसायबाट वार्षिक ७० देखि ८० लाख रुपैयाँसम्मको कारोबार हुने गरेको उनले बताए ।

परिवारका चार दाजुभाइमध्ये तीन जनाले विभिन्न विषयमा स्नातकोत्तर गरेका छन् । गोविन्द स्वयं चितवन मेडिकल कलेजमा अध्यापन गर्छन् । सुरुमा तीन जनाको समूहले थालेको व्यवसाय अहिले परिवारका चार दाजुभाइ मिलेर सञ्चालन गरिरहेका छन् ।

यस वर्ष तिहारलाई लक्षित गरी पाँच बिघा जमिनमा लगाइएको फूलबाट ३० देखि ४० हजार माला र ५०० किलो फूल उत्पादन गर्ने लक्ष्य राखिएको छ । अन्य समयमा भने मासिक छ हजारभन्दा बढी माला उत्पादन हुने गरेको बाँस्तोलाले बताए ।

यस वर्षको तिहारमा २० देखि २५ जनालाई रोजगारी दिएर करिब २५ लाख रुपैयाँ आम्दानी गर्ने लक्ष्य परिवारले राखेको छ । चितवनमा उत्पादित फूलको मुख्य बजार काठमाडौं, पोखरा, हेटौँडा, बुटवल, धनगढी, नेपालगञ्ज र बागलुङलगायत सहर हुन् । उत्पादित फूलमध्ये करिब ४० प्रतिशत चितवनमै खपत हुने गरेको छ भने बाँकी अन्य जिल्लामा बिक्रीका लागि पठाइने गरिएको छ ।

रोजगारी गुमेपछि सुरु गरिएको सामान्य फूलखेती सात वर्षमै विदेशसम्म बजार विस्तार गर्न सफल भएको छ । यसले व्यावसायिक कृषि र पारिवारिक उद्यममार्फत स्थानीय उत्पादनलाई अन्तर्राष्ट्रिय बजारसम्म पुर्‍याउन सकिने सम्भावनासमेत देखाएको छ ।