मिदासले 'मेरो डाक्टर' एपमार्फत अनलाइन भिडियो परामर्श बिहीबारदेखि सुरू गरेको छ । कोभिड-१९ महामारीसँगैको जारी बन्दाबन्दीले हिँडडुलमा कठिनाइ भइ धेरै बिरामी आफ्नो नियमित स्वास्थ्य परिक्षणका लागि अस्पतालमा आउन नसकेको अवस्थालाई मध्यनजर गर्दै मिदासले उक्त सेवा सुरू गरेको हो ।

समयमै उपचार वा परामर्शबाट बञ्चित हुनुपर्दा बिरामीको रोग बढी च्यापिसकेको अवस्थामा पुग्ने जोखिमलाई न्यूनीकरण गर्न र बिरामीको चिकित्सक वा अस्पतालसँगको सम्पर्क स्थापित गर्न यो अनलाइन भिडियो परामर्श सेवा प्रभावकारी हुने कम्पनीले विश्वास लिएको छ । नेपालका सयौँ कन्सल्टेन्ट डाक्टर र कैयन अस्पताल यस एपमा उपलब्ध हुनेहुँदा जुनसुकै रोगका बिरामीले जुनसुकै स्थानबाट अनलाइन भिडियो परामर्श पाउन सक्ने गरी व्यवस्था मिलाइएको मिदास टेक्नोलोजिज्स प्रालिका प्रबन्ध निर्देशक छत्रहरी कार्कीले बताए ।

जारी कोभिड-१९, को बन्दाबन्दीको अवस्थाका अतिरिक्त सामान्य समयमासमेत विशेषज्ञ चिकित्सकले यस एपमार्फत स्वास्थ्य सेवा परामर्श दिन सकिने गरी व्यवस्था मिलाईएको छ । यसबाट स्वंय विरामीको समय र पैसा दुवैको बचत भइ अस्पतालमा हुने अनावश्यक भीड कम गर्न मुख्य सहयोगी हुने विश्वास कम्पनीको छ । सामान्यतया रोगले च्यापेर थला नपरीकन अस्पताल वा डाक्टरको सम्पर्कमा जान नचाहाने अधिकांशलाई यो अनलाइन भिडियो परामर्श अत्यन्तै उपयोगी हुने कम्पनीले जनाएको छ । सामान्य रोगलाई अनलाइन परामर्शबाट नै उपचार गर्न,जटिल बन्न नदिन र उपचार सम्भव हुँदै अस्पतालको सम्पर्कमा जान प्रेरणा प्रदान गर्ने उद्देश्यका साथ यो अनलाइन भिडियो परामर्श सेवाको परिकल्पना गरिएको हो । कोभिड-१९ सँग सम्बन्धित सम्पूर्ण स्वास्थ्य परामर्श सबै यस अनलाइन भिडियो परामर्शमा निशूल्क हुनेगरी व्यवस्था मिलाइएको छ ।

यो सेवा कसरी लिने ?

विरामीले आफुसँग रहेका मोबाइल अथवा ल्याप-टपमार्फत आफुले अनलाइन भिडियो परामर्श लिन चाहेको डाक्टरको समय कुनै पनि समय र स्थानबाट लिन सक्नेछन् । एन्ड्रोइड फोन प्रयोगकर्ताले गुगल प्ले स्टोरमा गएर सजिलै ‘मेरो डाक्टर’ एप डाउनलोड गर्न सक्नेछन् । iOS फोन प्रयोगकर्ता हो भने एप्पल स्टोरमा गएर तुरुन्तै ‘मेरो डाक्टर’ एप डाउनलोड गर्न सक्नेछन् । ल्याप-टप वा डेस्क-टपबाट यो सेवा लिन चाहानेले भने सिधै http://www.merodoctor.com टाइप गरेर यो सेवा लिन सक्नेछन् ।

माथि उल्लेखित कुनै पनि ग्याजेट तथा इन्टरनेट सुविधा उपलब्ध भएनन् भने आफुलाई पायक पर्ने नजिकैको फार्मेसी, क्लिनिक तथा स्वास्थ्य चौकीमा पुगेर यो सेवा लिन सक्नेछन् । मेरो डाक्टर एप कसरी प्रयोग गर्ने भन्ने सम्बन्धमा प्रयोगकर्ताले http://www.merodoctor.com/help लिकं खोल्न पनि सक्नेछन् । प्रयोगकर्ताको सजिलोका लागि यो लिंकमा भिडियो म्यानुअल राखिएको छ ।