प्रभु बैंक लिमिटेडले आफ्नो २१३औं शाखा जुम्लाको चन्दननाथ नगरपालिका- ६ मा स्थापना गरेको छ । बैंकको सो शाखा चन्दननाथ नगरपालिकाका प्रमुख कान्तीका सेजुवालले सोमबार उद्घाटन गरेकी हुन् ।

प्रभु बैंकले आफ्नो बैंकको व्यावसायिक सञ्जाल विस्तार गर्दै बैंकिङ पहुँच नपुगेको ठाउँहरुमा शाखा कार्यालय सञ्चालनमा ल्याएर सर्वसाधारणको घर आँगनसम्म सरल र सहज रुपमा बैंकिङ सेवा विस्तार गरी प्रशंसनीय कार्य गरेको नगर प्रमुख सेजुवालले बताइन् । बैंकको यो अभियानले देशभरी नै बैंकिङ पहुँचमा वृद्धि भएको मात्र नभई समग्र देशको आर्थिक विकासमा सकारात्मक टेवा पुगेको बताउँदै उनले बैंकलाई सफलताको शुभकामना व्यक्त गरिन् ।

बैंकको जुम्ला शाखाबाट सेवा उपभोग गरी सो क्षेत्रका स्थानीय बासिन्दा, व्यवसायिक फर्म, कम्पनी तथा संघ संस्थाहरु लाभान्वित हुने र स्थानीय सर्वसाधारणमा बैंकिङ बानीको विकासमा अभिवृद्धि भई स्थानीयस्तरको सम्पूर्ण आर्थिक कारोबार बैंकिङ प्रणालीमा प्रवेश गर्नुका साथै त्यस क्षेत्रको समग्र आर्थिक उन्नतिमा महत्वपूर्ण सहयोग पुग्ने बैंकको विश्वास छ ।

प्रकाशित समय : २३:४१ बजे