काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

गाउँपालिकामा शैक्षिक सुधार अभियान

15.52K
shares

बाँके– बाँकेको जानकी गाउँपालिकाले शैक्षिक सुधारका लागि विशेष योजना ल्याएको छ । विद्यालयमा शिक्षक समयमै नआउने, ध्यानपूर्वक नपढाउने र समयमै छात्रवृत्ति वितरण नगर्ने जस्ता अभिभावकको गुनासो सम्बोधन गर्दै समग्र शैक्षिक सुधारका लागि गाउँपालिकाले अग्रसरता देखाएको हो ।
सबै विद्यालयमा नभए पनि केही विद्यालयमा अभिभावकको गुनासो यथार्थ रहेकाले विशेष योजनाका साथ शैक्षिक सुधारमा जोड दिइएको गाउँपालिका अध्यक्ष रामनिवास यादवले बताए । विद्यार्थी–शिक्षक दुवैलाई १० देखि ४ बजेसम्म विद्यालयमा नियमित उपस्थित गराउने र सबै पिरियड पढाइ हुने वातावरण तत्काल मिलाउन गाउँपालिकाले सबै विद्यालयलाई सचेत गराइएको उनले जानकारी दिए ।
विद्यार्थीको भर्ना र कक्षामा उपस्थिति तथ्यांकसमेत विश्लेषण गर्ने काम गरिएको अध्यक्ष यादवले बताए । केही विद्यालयमा विद्यार्थी भर्ना भएको संख्याको ५० देखि ८० प्रतिशतमात्रै उपस्थिति पाइएको छ । विद्यालयको वर्तमान अवस्था पहिचान गरी विद्यालय सुधार योजना अगाडि बढाउने तयारी गाउँपालिकाको छ ।
गाउँपालिकामा आधारभूत अनिवार्य शिक्षा र निःशुल्क शिक्षाको नारासहित समस्या पहिचान र सुधार योजनाका साथ विद्यालय अनुगमन भइरहेको गाउँपालिकाकी उपाध्यक्ष भूमिसरा धितालले जानकारी दिइन् । विद्यार्थी अनियमित हुने समस्या ठूलो देखिएकाले नियमित गर्ने अवस्थाको पहिचान गर्ने कार्य भइरहेको उनको भनाइ छ । जानकी गाउँपालिकामा ३ मावि, ६ आधारभूत गरी ४५ विद्यालय छन् ।