राष्ट्रिय जनता पार्टी नेपाल (राजपा)लाई संसदीय दलको नेता चयन गर्न सकस परेको छ । आकांक्षीहरुले अडान नछाड्दा प्रतिनिधिसभा निर्वाचन भएको सात महिना बितिसक्दा पनि राजपाले दलको नेता पाउन सकेको छैन । वर्ष दिनअघि ६ वटा दल एकीकरण भई बनेको राजपामा अध्यक्षमण्डल संयोजक महन्थ ठाकुर र सदस्य राजेन्द्र महतोले संसदीय दलको नेतामा आकांक्षा देखाएका छन् ।
दुवै नेताले आकांक्षा नत्याग्दा सर्वसम्मत चयन गर्ने प्रयास सफल हुन सकेको छैन । ठाकुरलाई, अध्यक्ष मण्डलका सदस्यहरु मेहन्द्रराय यादव, शरतसिंह भण्डारीको समर्थन छ भने महतोलाई अनिलकुमार झा र राजकिशोर यादवको समर्थन छ ।
पार्टीमा कुनै पनि निर्णय गर्दा अध्यक्ष मण्डलमा सल्लाह अध्यक्ष मण्डलका संयोजक ठाकुरले एकलौटी निर्णय गरेको भन्दै असन्तुष्ट जनाउँदै आएका महतो दलको नेता छाड्ने पक्षमा छैनन् । यता, ठाकुर पनि पार्टीको संयोजक आफू रहेकाले दलको नेता आफैंले लिनुपर्ने अडानमा छन् । अध्यक्षमण्डल संयोजक ठाकुर र सदस्य महतोले संसदीय दलको नेतामा आफ्नो दाबी कायम राखेपछि पटक–पकट तोकिएको पार्टीको राजनीतिक बैठकसमेत बस्दै नबसी स्थगित हुँदै आएको हो ।
संसदीय दल नेतामा सहमति हुन नसकेपछि पटक–पटक तोकिएको बैठक स्थगित हुँदै आएको छ । यसअघि, २५ जेठमा हुने भनिएको राजनीतिक समिति बैठक स्थगित भएपछि सोमबारका लागि बैठक बोलाइएको छ । बैठकमा संसदीय दलको नेता सर्वसम्मत चयन गर्ने, दलको विधान पारित गर्ने र पार्टी महाधिवेशनको मिति तय गर्ने एजेन्डा रहेको महासचिव केशव झाले जानकारी दिए । ‘सोमबारको बैठकमा आकांक्षी दुईमध्ये एकजनालाई अरु जिम्मेवारी दिने सहमति गरेर जसरी पनि कन्भिन्स गर्दै सर्वसम्मत दलको नेता चयन गर्छौं,’ झाले न्युज कारोबारसँग भने ।
महाधिवेशनको म्याद थप्न आग्रह गर्ने
राजपा राजनीतिक समिति बैठकले महाधिवेशन मिति तोक्ने र महाधिवेशन गर्न निर्वाचन आयोगसँग ६ महिना म्याद थप्नका लागि आग्रह गर्ने नेताहरुले बताएका छन् । ६ दल एकीकरणपछि एक वर्षअघि दर्ता भएको राजपालाई असार ३० गतेसम्ममा महाधिवेशन सम्पन्न गर्न निर्वाचन आयोगले निर्देशन दिएको छ । राजपाको विधानअनुसार नै आयोगले महाधिवेशन सम्पन्न गर्न निर्देशन दिएको हो ।
राजपाको विधानको धारा २२ (१०) मा एक वर्षभित्र महाधिवेशन गरिनेछ भन्ने प्रावधान छ । निर्वाचन आयोगको निर्देशनबारे राजनीतिक समितिको बैठकले आयोगलाई पत्र पठाउनेबारे निर्णय लिने महासचिव झाले बताए ।

प्रकाशित समय : ००:२८ बजे