रामेछाप– रामेछापको मन्थली नगरपालिका–११ मा लिफ्ट खानेपानी आयोजनाको काम सुरु भएसँगै स्थानीयमा खुसियाली छाएको छ । वडा कार्यालयको नेततृत्वमा तामाकोसी लिफ्ट खानेपानीको काम सुरु भएपछि खानेपानीको अभावमा काकाकुल बनेका स्थानीयबासी हर्षित बनेका हुन् ।
वडा कार्यालयको नेत्तृत्वमा तामाकोसीको पानी लिफ्ट प्रविधिमार्फत गाउँमा पुर्याउन स्थानीय लागिपरेका छन् । खानेपानी आयोजना केन्द्रीय योजनामा परेपछि आफ्नै गोजीबाट पैसा हालेर गेलुबासी आयोजना निर्माणमा जुटेका छन् । लिफ्ट खानेपानी आयोजनाको काम सुरु भएसँगै वडा नम्बर ११ का २ हजार २ सयभन्दा बढी घरपरिवारमा खुसी छाएको स्थानीय होमबहादुर बुढाथोकीले बताए ।
द्रुत गतिमा निर्माण भइरहेको नागिला खानेपानी लिफ्ट खानेपानीबाट मन्थली–११ का नाटिला, माख्लो नाटिला, खमारे, सावा डाँडा र काउलेका बासिन्दालाई खानेपानी सहज हुनेछ । स्थानीय बासिन्दा उत्साहका साथ आयोजना निर्माणमा जुटेको नागिला खानेपानी लिफ्ट खानेपानी उपभोक्ता समितिका अध्यक्ष रामबहादुर थापामगरले जानकारी दिए ।
मन्थली नगरपालिका–११ को प्रमुख समस्या खानेपानी नै हो । खानेपानी नहुँदा यो वडाका धेरै मानिस अन्यत्र बसाइँ सरिसकेका छन् । यही समस्यालाई मध्यनजर गरेर आफूहरुले लिफ्ट खानेपानी आयोजना सुरु गरेको र यसलाई केन्द्रीय सरकाराले सहयोग गर्नुपर्ने मन्थली–११ का अध्यक्ष भीमबहादुर थापामगर बताउँछन् ।
मन्थली नगरपालिका–११ रामेछापको एउटा प्रतिनिधिमूलक ठाउँ हो । जिल्लाको साविकका २७ भन्दा बढी गाविस सुख्खाग्रस्त छन् । यी ठाउँमा वर्षातको समयमा समेत खानेपानीको हाहाकार हुन्छ । सरकारी तथा गैरसरकारी क्षेत्रबाट एकाध ठाउँमा लिफ्ट खानेपानी आयोजना बने पनि अपर्याप्त छ । तामाकोशीनजिक रहेका बस्तीलाई लिफ्ट खानेपानी आयोजना प्रभावकारी भए पनि अन्य ठाउँका नागरिकलाई भने पिउनेपानी ‘आकाशको फल आँखा तरी मर’ भनेजस्तै भएको छ ।

प्रकाशित समय : ०३:०९ बजे