हत्या भएको ४८ दिन हुँदा पनि सौरभका हत्यारा पत्ता लागेनन्
वि.सं.२०७५ असोज २ मंगलवार ०१:०४
shares

साउन १५ गते सुतीरहेकै ठाउँमा हत्या गरिएका नोबेल मेडिकल कलेजका विद्यार्थी सौरभ उप्रेतीका हत्यारा अहिलेसम्म पनि पत्ता लागेका छैनन् । छोराको हत्या भएको ४८ दिन वितीसकेको भए पनि हत्यारा पत्ता नलाग्दा परिवारको अवस्था सोचनीय बन्दै गएको छ ।
नोबेल मेडिकल कलेज विराटनगरमा अध्यनरत उप्रेतीका बाबु अर्जुन उप्रेती र आमा गोपीनी उप्रेती आफ्नो छोराले आत्माहत्या गरेको प्रहरीको भनाइलाई अस्वीकार गर्छन् ।
सोमबार काठमाडौंमा पत्रकार सम्मेलन गर्दै सौरभका बाबुआमाले आफ्नो छोराले आत्महत्या गरेको नभई उसको हत्या भएको दावी गरे । ‘शरीर भरी निलो डाम छ, तर प्रहरी भने आत्माहत्या गरेको भन्ने कुरा प्रमाणित गर्न लागी परिरहेका छन्,’ पत्रकार सम्मेलनमा सौरभका बाबुआमाले भने, ‘दुई फिटको टेबलमा छ फिटको मान्छेले पासो लगाएर कसरी आत्महत्या गर्न सक्छ ?’
सौरभ शिक्षा मन्त्रालयको छात्रवृत्तिमा नोबेल मेडिकल कलेज बिराटनगरमा एमबिबिएस चौथो वर्षमा अध्ययनरत थिए । उनी जेहेन्दार र कक्षामा प्रथम विद्यार्थी रहेको उनका बाबुआमाको भनाई छ । उनको शव घाँटीमा ल्यापटपको तारले बेरिएर मृत अवस्थामा भेटीएको थियो । आफ्नो छोराले आत्माहत्या नगरेको र प्रहरीले प्रमाण लुकाउन खोजेको परिवारको आरोप छ ।
सौरभको हत्या भएको तर, प्रशासन त्यसलाई आत्महत्यामा परिणत गर्न लागिपरेको बाबुआमाको आरोप छ । सौरभका आमाबाबुले कलेजका पदाधिकारीमाथि पनि प्रश्न चिह्न उठाएका छन् ।
सुरुमा आफूहरुलाई घटनाका सम्बन्धमा राम्रोसँग छानविन गर्ने भन्दै दाह संस्कार गर्न लगाएको तर पछि किटानी जाहेरी लिन पनि नमानेको उनीहरुको गुनासो छ । अहिले वर्ष दिन पहिले सेयर गरेको भिडियो र चार महिना अघि वाचन गरेको कवितालाई आधार मानेर आत्महत्या प्रमाणित गर्न खोजेको भन्दै उनीहरुले दुःखेसो पोखे ।
घटनाका सम्बन्धमा बाबुआमाले उठाएका केहि प्रश्नहरु :
१. घटनाबारे सँगै अध्यनरत साथि त्यसदिन पनि सँगै सुतेको भनिएको साथीलाई विहान करिब ५ बजेतिर थाह भयो भनियो तर, परिवारको सदस्यलाई विहान ७ बजेपछि घरबेटिले फोन गरेर घटनाको जानकारी गराइयो त्यो पनि अचेत अवस्थामा अस्पतालमा उपचार भइरहेको छ भनेर । मृत्यु भइसकेको मान्छेलाई उपचार भइरहेको छ भनेर किन भनियो ? ५ वर्षदेखि सँगै बस्ने साथीले किन जानकारी गराएन ?
२. अचेत अवस्थामा नोबल मेडिल कलेजमा उपचार भइरहेको छ भन्ने जानकारीपश्चात इमरजेन्सिमा फोन गरेर सोध्दा ड्युटीमा रहेका अस्पतालका कर्मचारीले मृत्यु भइसकेको जानकारी गराउँदा पनि कलेज प्रशनसनलाई घटनाकोबारे फोन गरी सोध्दा हामीलाई थाह छैन किन भनियो ?
३. लासलाई अस्पताल पुर्याइएको केही घण्टापछि मात्र प्रहरीले घटनाबारे जानकारी पाएको छ । घटनाबारे प्रहरीलाई किन समयमा जानकारी गरिएन ?

























