च्याम्पियन्स लिग फुटबल अन्तर्गत गएरातिको खेलमा स्पेनिस ला लिगा च्याम्पियन बार्सिलोनाले शानदार जीत दर्ता गराएको छ । बार्सिलानोका अर्जेन्टाइन स्टार स्ट्राइकर लियोनल मेसीको ह्याट्रिकको मद्दतले पीएसभी ४–० गोल अन्तरले पराजित भएको हो । मेसीले योसँगै आफ्नो करियरको ४८औं ह्याट्रिक पूरा गरेका छन् । अर्को एक गोल भने डेम्बेलेले गरेका थिए ।

फ्रीकिकमार्फत पहिलो हाफको ३१अाैं मिनेटमा मेसीले बार्सिलोनालाई अग्रता दिलाएका थिए । ७४ औं मिनेटमा डेम्बेलेले गोल गर्दै बार्सालाई २–० अग्रता दिलाए । खेलको ७७औं मिनेटमा इभान राकिटिकको पासमा मेसीले व्यक्तिगत दोस्रो गोल गरे । स्यामुयल उम्टी दोहोरो पहेँलो कार्ड खाँदै मैदान बाहिरिए पछि बार्सिलोना १० खेलाडीमा सिमित बनेको थियो । ८७औं मिनेटमा लुइस स्वारेजको सुन्दर पासमा मेसीले ह्याट्रिक पूरा गरेका थिए ।

समूह बी कै अर्को खेलमा इन्टर मिलानले टोटेनहमलाई २–१ गोलअन्तरले पराजित गरेको छ । हिजै भएको समूह सी अन्तर्गतको खेलमा अतिरिक्त समयमा गोल खाँदै फ्रान्सेली क्लब पीएसजी इंग्लिस क्लब लिभरपुरसँग ३–२ गोलले पराजित भएको छ ।

प्रकाशित समय : १४:५५ बजे