बहुराष्ट्रिय कम्पनी कोकाकोलामा अब नेपाली चिनी
वि.सं.२०७५ पुस ४ बुधवार १८:५०
shares

बोटलर्स नेपालले पहिलोपटक स्वदेशी उद्योगबाट उत्पादित चिनी कोकाकोलालगायतका पेय पदार्थमा प्रयोग गर्न थालेको छ । बोटलर्स नेपाल बालाजु र बोटलर्स तराई लिमिटेडले सिराहामा सञ्चालित हिमालय सुगर मिल्ससँग चिनी खरिद गर्न थालेका हुन् । बोटलर्स नेपाल बहुराष्ट्रिय कम्पनी कोकाकोलाको पेय पदार्थ उत्पादक कम्पनी हो ।
कम्पनीले अहिलेसम्म करिब २५ करोडको चिनी खरिद गरिसकेको हिमालय सुगर मिल्सका प्रमुख शशिकान्त अग्रवालले बताए । ‘अब कोकले नियमित नेपालको चिनी खरिद गर्नेछ,’ न्युज कारोबारसँग उनले भने, ‘बहुराष्ट्रिय कम्पनीले नेपाली चिनी प्रयोग गर्न थाल्नुले चिनीको गुणस्तरमाथिको प्रश्न गर्ने ठाउँ मेटिदिएको छ ।’ यसअघि, नेपाली चिनीको गुणस्तरमा शंका गर्दै बोटलर्सले विदेशबाट चिनी किन्दै आएको थियो । बोटलर्सले स्थापनाको ३९ वर्षपछि पहिलोपटक स्वदेशी उद्योगसँग चिनी किनेको हो ।
नेपाली चिनी उठाउनुअघि कोकले अमेरिका, थाइल्यान्ड र भारतमा रहेका विशेषज्ञबाट हिमालय सुगर मिल्सको चिनीको गुणस्तर मापन गराएको जनाइएको छ । हिमालय सुगर मिल्सले नेपाली उद्योगबाट चिनी उठाउनु नेपाली उद्योग क्षेत्रकै उपलब्धि भएको प्रमुख अग्रवालले बताए । उद्योगले कोकको आवश्यकताअनुसार चिनी उपलब्ध गराउन सक्ने उनले स्पष्ट पारे ।
एमएस र एभरेष्ट समूहको संयुक्त लगानीमा सञ्चालित हिमालय सुगर मिल्सले रसायन अर्थात् गन्धक र चुनरहित चिनी उत्पादन गर्दै आएको छ । दैनिक दुई हजार पाँच सय टन उखु पेल्ने क्षमता रहेको उद्योगले दैनिक अढाइ सय टनसम्म चिनी उत्पादन गर्ने क्षमता राख्छ ।
सरकारले चिनीको आयातमा लाग्दै आएको भन्सार महसुल सय प्रतिशतले बढाउँदै १५ बाट ३० प्रतिशत पुर्याएको थियो । विदेशी चिनी आयात निरूत्साहित भएसँगै स्वदेशी उद्योगीलाई सहज भएको छ ।

























