नयाँदिल्ली । चाडपर्वको मौसम नजिकिँदै गर्दा चिनीको मूल्य बढ्न थालेपछि भारतले १० लाख मेट्रिक टनसम्म कच्चा चिनी भन्साररहित आयात गर्न स्वीकृति दिएको छ।

भारतको संघीय वाणिज्य मन्त्रालयले बिहीबार विज्ञप्ति जारी गर्दै ‘ट्यारिफ रेट कोटा’ (टीआरक्यू) अन्तर्गत १० लाख मेट्रिक टनसम्म कच्चा चिनी भन्साररहित आयात गर्न सकिने जनाएको हो। यो सुविधा आगामी अक्टोबर ३१ सम्म लागू हुनेछ।

स्थानीय बजारमा कच्चा चिनीको आपूर्ति घट्न सक्ने चिन्ता बढेपछि सरकारले आयात सहज बनाउने निर्णय गरेको हो। आयातमार्फत घरेलु बजारमा चिनीको आपूर्ति बढाएर मूल्य नियन्त्रण गर्ने सरकारको अपेक्षा छ।

भारतमा सेप्टेम्बरदेखि जनवरीसम्म चिनीको खपत उच्च हुने गर्छ। दसैं, दीपावलीलगायतका चाडपर्वमा मिठाई तथा अन्य मिठासयुक्त खाद्य पदार्थको माग बढ्ने भएकाले चिनीको खपत पनि बढ्ने गरेको छ।

यस वर्ष कमजोर मनसुनको सम्भावनाले चिनी उत्पादन प्रभावित हुन सक्ने चिन्ता पनि बढेको छ। एल निनोको सम्भावित प्रभावका कारण मनसुन औसतभन्दा कमजोर हुन सक्ने अनुमान भइरहेका बेला उत्पादन घट्ने आशंकाले स्थानीय बजारमा चिनीको मूल्यसमेत रेकर्डस्तरमा पुगेको बताइएको छ।

यसअघि भारतले आन्तरिक आपूर्ति बढाउने उद्देश्यले गत मे महिनामा चिनी निर्यातमा प्रतिबन्ध लगाएको थियो। उक्त प्रतिबन्ध सेप्टेम्बर ३० सम्म कायम रहनेछ।

निर्यातमा प्रतिबन्ध कायम राख्दै कच्चा चिनीको भन्साररहित आयात खुला गर्ने पछिल्लो निर्णयले भारतले चाडपर्वको उच्च मागअघि घरेलु बजारमा पर्याप्त चिनीको आपूर्ति सुनिश्चित गर्न खोजेको देखिन्छ।

प्रकाशित समय : १०:५७ बजे