यही जेठ २० देखि कुवेतमा हुने फिफा विश्वकप छनाेटअन्तगर्त नेपालले खेल्ने तीनै खेलको प्रत्यक्ष प्रशारण कान्तिपुर टेलिभिजनले गर्ने भएको छ । यसका लागि अखिल नेपाल फुटबल संघ (एन्फा) र कान्तिपुर टेलिभिजनबीच सम्झौता भएको छ ।

फिफा विश्वकप छनाेटको दोस्रो चरणमा नेपालले कुवेतमा तीन खेल खेल्नेछ । नेपालले जेठ २० गते चाइनिज ताइपेई, जेठ २४ गते जोर्डन र जेठ २८ गते अष्ट्रेलियासँग खेल्ने तालिका छ । नेपालले घरेलु मैदानमा खेल्नुपर्ने प्रतियोगिता कोभिड महामारी कारण अवे मैदानमा खेल्न लागेको हो । एशियन फुटबल महासंघले समुह 'बी' का सबै खेल कुवेतमा गराउने निर्णयअनुसार नेपालले कुवेतमा दोस्रो चरणका खेल खेल्न लागेको हो ।  नेपालले खेल्ने सबै खेल नेपाली समयअनुसार रातकाे ९:४५ बजेबाट सुरू हुने छन् ।

विश्व कप छनोटअन्तर्गत नेपालले कुवेतसँग दुवै खेल भने खेलिसकेको छ । पहिलो खेलमा कुवेतकाे मैदानमा ७-० को हार बेहोरेको नेपालले भुटानमा भएको खेलमा १-० ले गुमाएको थियो । दशरथ रंगशालाकाे निर्माण पूरा नभएका कारण न्यूट्रल भेन्यूका रुपमा नेपाल र कुवेतले भुटानकाे थिम्पुस्थित चाङलिमिथाङ रंगशालामा खेलेका थिए । अन्य अवे खेलमा चाइनिज ताइपेलाई २-० ले हराएको नेपालले अष्ट्रेलियासँग ५-० र जोर्डनसँग ३-० को पराजय भोगेको थियो । ५ खेलमा १ जित र ४ खेलमा हार बेहोरेको नेपाल अहिले ३ अंकका साथ चौथो स्थानमा छ । अष्ट्रेलिया १२ अंकका साथ शीर्षस्थानमा छ भने कुवेत र जोर्डनको समान १० अंक छ । अंक तालिको पुछारमा रहेको ताइपेइले अंक जोड्न सकेको छैन ।