नबिल इन्भेष्टमेण्ट बैंकिङ लिमिटेडले संस्थागत परामर्शदाता सेवाअन्तर्गत बिजनेश क्लिनिक सञ्चालनमा ल्याएको छ । जसबाट सर्वसाधारण लगानीकर्ता, व्यवसाय गर्न चाहने व्यक्ति तथा संस्थाहरुका लागि निकै उपयोगी हुने देखिएको छ ।

बिजनेश क्लिनिक वित्तीय तथा लगानीका क्षेत्रहरुको सम्भावना तथा समस्याहरुलाई पहिचान गरी समाधान गर्न सुरु गरेको परामर्श सेवा हो । ग्राहकले नबिल इन्भेष्टमेण्टका लगानी विशेषज्ञहरुद्वारा आफ्नो लगानी तथा अन्य वित्तीय परामर्श लिई आफ्नो सम्पत्तिको जोखिम न्यूनीकरण गरी प्रतिफलको उद्देश्य प्राप्त गर्नसक्ने देखिन्छ । यस सेवाअन्तर्गत ईक्विटी परामर्श, लगानी व्यवस्थापनसम्बन्धी परामर्श, कर्जा तथा ऋणसम्बन्धी परामर्श, पूँजी संरचनासम्बन्धी परामर्श, दैनिक कार्य सञ्चालन तथा पूँजी व्यवस्थापनसम्बन्धी वित्तीय परामर्श, व्यापार पुन:संरचना/पुनर्गठनसम्बन्धी वित्तीय परामर्श लिन सक्नेछन् ।

त्यस्तै व्यापार/व्यावसाय विस्तारसम्बन्धी परामर्श, व्यापार सुरु गर्ने सम्बन्धी परामर्श, सम्पत्ति व्यवस्थापनसम्बन्धी परामर्श, पोर्टफोलियो संरचना निर्माणसम्बन्धी परामर्श, पोर्टफोलियो फेरबदल/पुन:संरचनासम्बन्धी परामर्श, सेयर खरिद/बिक्री गर्ने निर्णयसम्बन्धी परामर्श, निश्चित फिर्ती लगानीसम्बन्धी परामर्श, सम्पत्ति/धन व्यवस्थापनसम्बन्धी परामर्श, व्यापार रणनीतिसम्बन्धी परामर्श र बजारीकरण रणनीतिसम्बन्धी परामर्श सेवा लिन सकिने कम्पनीले जानकारी गराएको छ ।

यस्तो सेवा नेपालमा हालसम्म कुनै पनि इन्भेष्टमेण्ट बैकिङले प्रदान गरेको पाइएको छैन । यो सेवा विस्तार गर्ने नबिल इन्भेष्टमेण्ट बैंकिंङ पहिलो संस्था हुन सफल भएको छ । जसले भविष्यमा व्यापार गर्न चाहने व्यापारी वा आफ्नो व्यापारलाई रणनीतिक रुपमा विस्तार गर्न चाहने व्यक्ति तथा संस्थाहरुको लागि निकै नै सहयोगी सिद्ध हुने देखिन्छ । यस्तो सेवा सार्वजनिक बिदाको दिन र शुक्रबारबाहेक प्रत्येक दिनको ३ देखि दिनको ५ बजेसम्म सञ्चालनमा रहने छ । एकपटक यो सेवा लिन आउँदा १ हजारको टिकट काट्नु पर्नेछ । तर चैत्र महिनाको लागि यो शुल्क छुट गरिएको व्यहोरा कम्पनीले जनाएको छ ।