कर्णाली प्रदेशको राजधानी वीरेन्द्रनगर नगरपालिकाका करिब ६१ प्रतिशत घरधुरी विभिन्न प्राकृतिक प्रकोपको जोखिममा रहेका छन् । नगरपालिकाले निर्माण गरेको विपद पूर्वतयारी तथा प्रतिकार्य योजनाअनुसार करिब ६१ प्रतिशत घरधुरी जोखिममा रहेका हुन् । 

नगरमा रहेका जम्मा २९ हजार २ सय १६ घरधुरीमध्ये १७ हजार ९ सय ४२ घरधुरी विभिन्न प्राकृतिक प्रकोपको जोखिममा रहेको पाइएको छ । नगरका सबै वडा केही न केही प्राकृतिक प्रकोपको जोखिममा रहेको अध्ययन प्रतिवेदनमा उल्लेख छ । नगरका १६ वटै वडा विभिन्न भौगोलिक विकटता र जोखिममा छन् । 

नगरको वडा नं. १२ को खोरिया, १३ को अधिकांश भूभाग तथा १४ र १५ नं. वडा पहिरोको उच्च जोखिममा रहेको प्रतिवेदनमा उल्लेख छ । उक्त वडाहरुमा पहिरोको जोखिममा रहेका १ हजार ३ सय ३५ घरधुरीमध्ये ६ सय ६७ घर पूर्ण क्षति हुनसक्ने र ६ सय ६८ घरधुरी आंशिक रुपमा क्षति हुनसक्ने अध्ययनले देखाएको वीरेन्द्रनगर नगरपालिकाका वरिष्ठ प्रशासकीय अधिकृत प्रकाश पौडेलले जानकारी दिए । उनका अनुसार १ देखि ८ सम्मका सबै र १२ नं. वडा बाढीको उच्च जोखिममा रहेका छन् । डुबानको उच्च जोखिममा भने वडा नं. ९ र १० रहेको पौडेलले बताए । दुवै वडामा बाढी र डुबानबाट पूर्ण क्षति हुनसक्ने ५ सय ९५ घर र आंशिक क्षति हुनसक्ने ६ सय ७० घरधुरी रहेको उनले बताए । आगलागीबाट पूर्ण क्षति हुनसक्नेमा ७५ घरधुरी तथा आंशिक रुपमा क्षति हुनसक्ने १ सय ५० घरधुरी गरी २ सय २५ घरधुरी रहेको उक्त विपद्को अनुमानित अवस्थाको अध्ययनले जनाएको छ । 

नगरको अधिकांश घरधुरी भूकम्पको समेत उच्च जोखिममा रहेको प्रशासकीय अधिकृत पौडेलले बताए । जसमा पूर्ण क्षति हुनसक्ने ५ हजार ८ सय ४३ घरधुरी र आंशिक रुपमा क्षति हुनसक्ने १५ हजार १ सय ९२ घरधुरी रहेको छ । जनसंख्यालाई आधार मान्दा ६२ प्रतिशत मानव स्रोत जोखिममा रहने अनुमान गरिएको अधिकृत पौडेलले बताए । उनका अनुसार भूकम्पबाट ६० हजार ७ सय ६८, आगलागीबाट ६ सय, बाढी तथा डुबानबाट ५ हजार ६०, पहिरोबाट ५ हजार ३ सय ४० जना गरी जम्मा ७१ हजार ७ सय ६८ जना प्रभावित हुने तथ्यांकमा उल्लेख छ । जुन कुल जनसंख्या १ लाख १५ हजार ४ सय ५१ को ६२ प्रतिशत हुन आउँछ । 

अध्ययनले वर्षेनी सडक दुर्घटनाका कारणसमेत १६ जनाको मृत्यु र १५ जना गम्भीर घाइते हुनसक्ने अनुमान गरेको उनले बताए । स्थानीय सरकार सञ्चालन ऐन २०७४ बमोजिम नगरको आगामी योजना तर्जुमा गर्दा यो तथ्यांक प्रभावकारी हुने उद्देश्यले अध्ययन गरिएको पौडेलले बताए ।

नगरप्रमुख देवकुमार सुवेदीले नगर विपद जोखिम न्यूनीकरण तथा व्यवस्थापन ऐन २०७६ को अधिकारभित्र रहेर नगर विपद पूर्वतयारी तथा प्रतिकार्य योजना निर्माण गरेको बताए । यसले वार्षिक कार्यक्रम तथा बजेट निर्माणका क्रममा सम्भावित जोखिमका क्षेत्रमा कार्यक्रम ल्याउन र जोखिमलाई न्यूनीकरण गर्न मद्दत पुग्ने उनले तर्क गरे । नगर प्रोफाइल २०७५ अनुसार वीरेन्द्रनगर नगरपालिकाको जम्मा जनसंख्या १ लाख १५ हजार ४ सय ५१ रहेको छ ।

प्रकाशित समय : २१:१३ बजे