सेवामा स्तरोन्नति गर्दै टेलिकम, अप्टिकल फाइबर विस्तार तीव्र
वि.सं.२०७५ जेठ २४ बिहीवार २२:५७
shares

काठमाडौं– नेपाल टेलिकमले आफ्ना सेवा स्तरोन्नति गर्दै गुणस्तर वृद्धि गर्न अप्टिकल फाइबर नेटवर्क विस्तार कार्यलाई तीव्रता दिएको छ । २०७५ असार मसान्तसम्म चार सय किलोमिटर एडीएसएस अप्टिकल फाइबर जडान सम्पन्न गर्ने लक्ष्य लिएकोमा वैशाखसम्ममा तीन सय ७५ किलोमिटर जडान भइसकेको कम्पनीले जनाएको छ । अब असार मसान्तसम्ममा थप एक सय ७५ किलोमिटर नेटवर्क जडान हुनेछ ।
आर्थिक वर्ष २०७५÷७६ को प्रथम चौमासिक अवधिमा बाँकी चार सय ५० किलोमिटर थप जडान कार्य सम्पन्न गरी१ हजार किलोमिटर अप्टिकल फाइबर नेटवर्क तयार गर्ने लक्ष्य टेलिकमको छ ।
हालसम्म टेलिकमले वसन्तपुर– तिरतिरे– पिलुवा– चैनपुर– तुम्लिङटार– खाँदबारी, हिले– भोजपुर, डडेल्धुरा– दिपायल, दिपायल– सिलगढी– साँफेबगर– मंगलसेन र लमही– तुलसीपुरमा नेटवर्क विस्तार गरिसकेको छ । त्यसैगरी, तामाकोसी पुल– खिम्ती– मन्थली– सिन्धुलीबीचको ११५.८ किलोमिटरमध्ये ९० किलोमिटर सम्पन्न भएको छ भने बेनी– जोमसोमबीचको ११३.४४ किलोमिटर रुटमध्ये ९५ किलोमिटरमा अप्टिकल फाइबर जडान कार्य सम्पन्न भइसकेको छ ।
यस्तै बुड्डी– बिजगौरी, तौलिहवा– मर्यादापुर, डण्डाबजार– चोरमारा, तौलिहवा– बहादुरगन्ज र कोहलपुर– लम्कीलाई जोड्ने १६३.२ किलोमिटर लामो अन्डरग्राउन्ड अप्टिकल फाइबर नेटवर्क हाल जडान तथा परीक्षण सम्पन्न भई सञ्चालनको तयारीमा छ । त्यस्तै केरखा– कोरोबारी र गौरादह– कोहोबारा जोड्ने अप्टिकल नेटवर्क जडान सम्पन्न भई स्प्लाइसिङ र टेस्टिङको चरणमा छ । स्याफ्रुबेँसी–रसुवागढी १५ किलोमिटरमध्ये १० किलोमिटर ट्रेन्चिङ र डक्टिङ कार्य सम्पन्न भइसकेको छ भने बाँकी खण्डमा ट्रेन्चिङ र डक्टिङ कार्य भइरहेको टेलिकमले जनाएको छ ।
अप्टिकल फाइबर नेटवर्कमार्फत पहाडी जिल्लाका सदरमुकाम र विभिन्न जिल्लाका नगरपालिका तथा सहरोन्मुख क्षेत्र जोडिनेछन् । टेलिकमले पहाडी जिल्लाहरु भोजपुर, संखुवासभा, खोटाङ, रामेछाप, दोलखा, मुस्ताङ, दैलेख, डडेलधुरा, डोटी, अछाम र बैतडीलाई अप्टिकल फाइबर नेटवर्कमा आबद्ध गराएको हो । यसबाट हाल सञ्चालनमा रहेका ३८ एक्सचेन्ज, ३४ बीटीएस र १९ रिपिटरहरुमा अप्टिकल फाइबर जोडिनेछन् ।
हालसम्म नेपाल टेलिकमले ५७ जिल्लामा अप्टिकल फाइबर नेटवर्क विस्तार गरिसकेको छ । चालू आयोजना सम्पन्न हुँदा ६४ जिल्ला सदरमुकाममा अप्टिकल फाइबर नेटवर्क विस्तार कार्य सम्पन्न हुने टेलिकमले जनाएको छ । मुलुकभरका ७७ जिल्ला सदरमुकाममा अप्टिकल फाइबर नेटवर्क विस्तार गर्ने लक्ष्य पूरा गर्न बाँकी १३ जिल्लामा हाल सर्भे कार्य प्रारम्भ भइसकेको छ । यी जिल्लामा उपयुक्त प्रविधि प्रयोग गरी चरणबद्ध रुपमा कार्य सम्पन्न गर्ने योजना कम्पनीको छ ।
टेलिकमले यसअघि नै विभिन्न चरणमा पाल्पा, पर्वत, बागलुङ, उदयपुर, सुर्खेत, धनकुटा, तेह्रथुम, सल्यान, म्याग्दी, गोर्खा, इलाम, पाँचथर, सिन्धुपाल्चोक, धादिङ, नुवाकोट, स्याङ्जा, गुल्मी, अर्घाखाँची, प्युठान, रोल्पा, लमजुङ र रसुवाका सदरमुकामलाई अप्टिकल फाइबर नेटवर्कमा जोडिसकेको छ । अप्टिकल फाइबर नेटवर्क विस्तार भएपछि कम्पनीको भ्वाइस र डाटा सेवा गुणस्तरीय हुनेछ । कम्पनीको ब्याकबोन प्रसारण निर्देशनालय, अप्टिकल आयोजना कार्यान्वयन विभागले यो योजना अघि बढाएको प्रवक्ता प्रतिभा वैद्यले जानकारी दिइन् ।

























