प्रदेश १ सामाजिक विकास मन्त्रालयले पहिलोपटक संसदमा टेबल गरेको घरेलु हिंसाको सम्बन्धमा व्यवस्था गर्न बनेको विधेयकमाथिको सैद्दान्तिक छलफल शुक्रबार सकिएको छ ।

छलफलमा बोल्दै प्रदेश नम्बर १ का सांसद मोहम्मद ताहिर मियाँले मुस्लिम समुदायमा व्याप्त रहेको तलाक प्रथाका कारण पनि मुस्लिम महिलाहरु हिंसामा पर्ने गरेको बताए । मुस्लिम समुदायमा प्रचलनमा रहेको तलाक प्रथालाई कानुनले मान्यता नदिएको भए पनि सामाजिक रुपमा यसले जरा गाडेको बताउँदै उनले यस विषयमा प्रदेश सरकारले ध्यान दिनुपर्ने बताए ।

छलफलमा सांसदहरुले राखेका विषयको जवाफ दिँदै सामाजिक विकास मन्त्री जिवन घिमिरेले उक्त ऐन लागू भएपछि घरेलु हिंसा न्युनिकरणमा सफलता मिल्ने विश्वास व्यक्त गरे ।

विधेयकमा पीडितका लागि प्रत्येक स्थानीय तहमा संरक्षण अधिकृतको व्यवस्था गर्ने, पीडितको पुनःस्थापना केन्द्र स्थापना गर्ने, पीडकको सम्पत्ति पीडितलाई उपलब्ध गराउने व्यवस्था गर्ने लगायतका विषय उल्लेख छ ।

विधेयकको सैद्दान्तिक छलफलमा १७ जना सांसदहरुले भाग लिएका थिए । सांसदहरुले विधेयकको नाम परिवर्तन गर्नुपर्ने र विषयगत समितिमा लगेर अझै गहन छलफल गरिनुपर्ने माग गरेका थिए ।