विश्व फुटबलको महाकुम्भ अर्थात् विश्वकप फुटबल प्रतियोगिताका २१औं संस्करण रुसको मस्कोमा भव्यताका साथ सुरु भएको छ । रुसको राजधानी मस्कोस्थित लुज्निकी रंगशालामा भव्य कार्यक्रम आयोजना गरी विश्वकप प्रतियोगिता उद्घाटन गरिएको हो ।

उद्घाटन कार्यक्रममा विश्वचर्चित सेलिब्रेटीको प्रस्तुतिसँगै ३२ राष्ट्रका खेलाडी, प्रशिक्षक र विभिन्न देशका अतिथिको उपस्थिति थियो । उद्घाटनमा बेलायतका गायक रोबी विलियम्सले गीत गाए भने रुसकी गायिका सोप्रानो अइडा गारिफुलिनाले उनलाई साथ दिइन् ।

करिब ८० हजार दर्शक क्षमता रहेको रंगशालाको उद्घाटन समारोहमा रुसको संस्कृति झल्किने नृत्य तथा प्रदर्शनका साथै विभिन्न देशका झन्डासँगै मार्चपास गरिएको थियो । असार ३१ गते समापन हुने विश्वकपमा ३२ देश सहभागी छन् । खेल रुसका विभिन्न सहरका १२ वटा रंगशालामा सञ्चालन हुनेछ ।

आयोजक रुसको सनसनीपूर्ण जित

उद्घाटन खेलमा आयोजक रुसले साउदी अरबविरुद्ध पाँच–शून्यको जित हात पारेको छ । खेलको १२औं मिनेटमै रुसका युरी गजिन्स्कीले गोल गर्दै साउदीमाथि दबाब सिर्जना गरेका थिए । निरन्तर दबाबमा राखेको रुसले ४३औं मिनेटमा अर्को गोल गरेको थियो । यसपटक डेनिस चेरिसेभले गोल गरे । ७१औं मिनेटमा आर्टिम ज्युबाले गोल गर्दै साउदीमाथि तीन–शून्यले अन्तर बढाए । खेलको अतिरिक्त समयमा चेरिसेभले व्यक्तिगत दोस्रो गोल गर्दा रुसले गोल अन्तर चार–शून्य बनायो । खेल सकिन केहीबेरमात्र बाँकी रहँदा एलेक्जेन्डर गोलोभिनले फ्रिकिकबाट उत्कृष्ट गोल गर्दै रुसलाई पाँच–शून्यको जित दिलाए ।

(तस्बिरहरू : फिफा)

प्रकाशित समय : १२:२१ बजे