नेपाल अटोमोबाइल डिलर्स एसोसिएसनले आयोजना गरेको नाडा अटो सोमा मोटरसाइकलका अधिकृत विक्रेताहरूले फाइनान्सिङ सुविधा पनि उपलब्ध गराएका छन् । अधिकांश मोटरसाइकल विक्रेताले आफैं फाइनान्सिङ सुविधा दिएका छन् भने कतिपयले बैंक र केहीले सहकारीबाट यो सुविधा उपलब्ध गराएका छन् ।

यूएमको अधिकृत विक्रेता आइएमर्इ अटोमोटिभले मनिग्राम र परिमलमार्फत कर्जा उपलब्ध गराएका छन् । मनिग्राम र परिमलले एक वर्षको फाइनान्स गर्दा १७ प्रतिशत र दुर्इ वर्षको लागि भने १८ प्रतिशत ब्याज लिन्छन् ।

केटिएम डुक बाइकको अधिकृत विक्रेता हंसराज हुलासचन्दले आफ्नै हुलास इन्भेस्टमेन्टमार्फत फाइनान्सिङ सुविधा उपलब्ध गराएको छ । इन्भेस्टमेन्टले २०० सिसी क्षमतासम्मका मोटरसाइकलका लागि ५० प्रतिशत डाउन पेमेन्टमा १५ प्रतिशत ब्याजमा कर्जा उपलब्ध गराएको छ । २०० सिसीभन्दा माथिको हकमा भने ४० प्रतिशत डाउन पेमेन्ट गरे पुग्छ ।

हिरो मोटरसाइकलको अधिकृत विक्रेता नेपाल जनरल मार्केटिङले आफ्नै फाइनान्स एनजीएम फाइनान्समार्फत स्कुटरका लागि १३ देखि १४ प्रतिशत ब्याजदरमा कर्जा उपलब्ध गराएको छ । १२५ सिसीभन्दा माथिको क्षमताका स्कुटरका लागि ४० प्रतिशत र १५० सिसीभन्दा माथिको क्षमता भएका बाइक खरिद गर्दा ५० प्रतिशत डाउन पेमेन्ट गर्नुपर्ने कम्पनीले जनाएको छ ।

रोयल इन्फिल्डको अधिकृत विक्रेता विवेक अटोमोबाइले लुम्बिनी विकास बैंकसँग सम्झौता गरेको छ । सम्झौताअनुसार बैंकले १४.८ प्रतिशतमा कर्जा प्रवाह गर्नेछ ।

एफटेकको अधिकृत विक्रेता म्याक्स भिजनले भने दुर्इ हप्तापछि बिक्री खुला गरेसँगै फाइनान्स व्यवस्था गर्ने कम्पनीको योजना छ । रनर मोटरसाइकलको अधिकृत विक्रेता रमन मोटर्सले बेथल इन्भेस्टमेन्टमार्फत १७ प्रतिशत ब्याजदरमा कर्जा उपलब्ध गराएको छ ।

भेस्पाको अधिकृत बिक्रेता डि लाइफ इस्टाइलले विभिन्न मोडलका बाइकको लागि १२ देखि १८ प्रतिशत ब्याजदरमा कर्जा उपलब्ध गराएको छ । बेनेलीको अधिकृत विक्रेता केटिएम इन्टरनेसनल ट्रेडिङले लुम्बिनी विकास बैंक र एभरेस्ट बैंकसँग कर्जाका लागि सम्झौता गरेका छन् । लुम्बिनीले १४ प्रतिशत र एभरेस्टले ९.९९ प्रतिशतमा कर्जा उपलब्ध गराउने सम्झौता भएको छ ।

सुजुकीको अधिकृत विक्रेता भिजी अटोमोबाइलले कर्जाका लागि कीर्तिपुर बहुद्देश्य सहकारी र मुक्तिनाथ विकास बैंकसँग टाइअप गरेको छ । सहकारीले न्यूनतम ३५ प्रतिशत डाउन पेमेन्ट र १५ प्रतिशत ब्याजदरमा कर्जा उपलब्ध गराएको छ भने मुक्तिनाथले १६ प्रतिशत ब्याज लिनेछ ।

यामाहाको अधिकृत विक्रेता एमएडब्लू इन्टरप्राइजले आफ्नै फाइनान्समार्फत १६ प्रतिशतमा कर्जा उपलब्ध गराएको छ ।

प्रकाशित समय : ००:३९ बजे