प्रधानमन्त्री केपी शर्मा ओलीले बूढीगण्डकी जलाशययुक्त आयोजना ठेक्कामा कुनै विवाद नरहेको दाबी गरेका छन् । चिनियाँ कम्पनी चाइना गेजुवा वाटर एन्ड पावर ग्रुप (सीजीजीसी)ले निर्विवाद पाउने ओलीले दाबी गरेका हुन् । न्यूयोर्कमा एसिया सोसाइटीद्वारा आयोजित ‘शान्ति, लोकतन्त्र र विकाससम्बन्धी अन्तरक्रियामा ओलीले भने, ‘बूढीगण्डकी आयोजना गेजुवालाई दिनेबारे कुनै पनि विवाद छैन ।’

व्यापक अध्ययनपछि नै बूढीगण्डकी आयोजनाको ठेक्का गेजुवालाई दिने निर्णय गरिएको ओलीको भनाइ छ । ‘गेजुवाले पुनः निवेदन दिएर काम गर्ने इच्छा जाहेर गर्यो,’ ओलीले भने, ‘तर हामीले हचुवाको भरमा दिएका होइनौँ, अध्ययन गर्यौँ, कम्पनीसँग कुरा गर्यौँ, मुलुकको हितमा छ कि छैन, कुनै विवाद छ कि छैन, सबै कुरा विचार गरेर दिएका हौँ । अन्य कुनै मुलुक लगानी गर्न चाहन्छ भने उनीहरूलाई लगानीको ढोका खुला रहेको ओलीले बताए । ‘हामीसँग धेरै आकर्षक परियोजना छन्,’ प्रधानमन्त्री ओलीले भने, ‘कुनै देश र कम्पनी लगानीका लागि तयार भए हामी स्वागतका लागि तयार छौँ ।’

बूढीगण्डकी : कहिले खोस्ने कहिले जिम्मा लगाउने !
बहुचर्चित १२ सय मेघावाटको बूढीगण्डकी जलाशययुक्त आयोजना चिनियाँ कम्पनी गेजुवालाई दिने निर्णय हालैमात्र गरेको हो । तर, ०७४ कार्तिक अन्तिम साता नेपालले आफैँ बनाउने भन्दै सरकारले चिनियाँ कम्पनी गेजुवालाई उक्त आयोजना निर्माणको जिम्मा दिने पुष्पकमल दाहाल सरकारको निर्णय खारेज गरेको थियो । सो आयोजना ’अनियमित’ र ’हचुवा’ मा चिनियाँ कम्पनीलाई दिएको भन्दै सरकारले निर्णय रद्द गर्नुपरेको स्पष्टिकरण दिएको थियो ।

बूढीगण्डकी जलविद्युत् आयोजना निर्माण गर्न ऊर्जा मन्त्रालय र सीजीजीसीबीच ०७४ जेठ २१ मा समझदारी पत्र (एमओयू) मा हस्ताक्षर भएको थियो । उक्त आयोजना निर्माणका लागि नेपाल सरकारलाई स्वीकार्य सर्तमा सीजीजीसीले चीन सरकारसँग सहुलियतपूर्ण, व्यपारिक अथवा अन्य किसिमले ऋण लिएर आयोजना निर्माण गर्ने सहमति भएको थियो । सिजीजीसीले आयोजनाको विस्तृत डिजाइन, निर्माण र लगानी गर्ने प्रक्रिया चलिरहेका बेला नै सरकारले चिनियाँ कम्पनीबाट आयोजना खोसेको थियो ।

आयोजना निर्माण सम्पन्न गर्न दुई खर्ब ६० अर्ब रूपैयाँ लाग्ने अनुमान गरिएको छ । यस आयोजनामा प्रतिमेगावाट करिव २०–२१ करोड रूपैयाँ लाग्ने अनुमान छ । जलाशययुक्त आयोजना भएकाले केही महँगो जस्तो देखिए पनि चमेलियाभन्दा आधा सस्तोमा बन्ने प्रक्षेपण थियो ।

प्रकाशित समय : १७:४३ बजे