पोखरामा मिडिया कप भलिबल प्रतियोगिता हुने भएको छ । केभसिटी मिडिया प्रालिको आयोजनामा असोज १२ र १३ गते प्रतियोगिता हुने सोमबार पोखरामा आयोजित पत्रकार भेटघाट कार्यक्रममा जानकारी गराइएको हो ।

राष्ट्रिय खेल भलिबलको विकास र विस्तारमा टेवा पुर्याउने तथा सञ्चारकर्मीबीचको आत्मियता र सद्भाव जगाउने उद्देश्यले प्रतियोगिता आयोजना गर्न लागिएको केभसिटी मिडिया प्रालिका भीमबहादुर थापाले बताए ।

पोखराको पुरानो टुँडिखेलमा आयोजना हुने प्रतियोगितामा करिब २० टिम सहभागी हुने थापाले जानकारी दिए । प्रतियोगितामा प्रथम हुनेलाई नगद ३३ हजार ३ सय ३३ र द्वितीय हुनेलाई नगद २२ हजार २ सय २२ रुपैयाँसहित ट्रफी, मेडल र प्रमाणपत्र प्रदान गरिने प्रालिका अध्यक्ष दुर्गाप्रसाद आचार्यले बताए ।

त्यस्तै, बेस्ट प्लेयरलाई नगद ३ हजार ३ सय ३३ तथा बेस्ट स्पाइकर, बेस्ट लिफ्टर, बेस्ट सर्भर, बेस्ट क्विकर र अनुशासित टिमलाई नगद १ हजार १ सय ११ सहित मेडल र प्रमाण प्रदान गरिनेछ ।

पोखरा महानगरपालिकाको विशेष सहयोग, वडा कार्यालय पोखरा १६ र १९ को सहयोग, नेपाल पर्यटन बोर्डको प्रवर्धन, कास्की जिल्ला भलिबल संघ तथा भलिबल ट्रेनिङ सेन्टर र राष्ट्रिय माविको प्राविधिक सहयोगमा हुने प्रतियोगितामा २ लाख खर्च लाग्ने अनुमान गरिएको थापाले बताए ।

प्रकाशित समय : १२:५६ बजे