काठमाडौं महानगरको ‘स्मार्ट सहरी प्रविधि’ प्रतिस्पर्धा
वि.सं.२०७५ मंसिर २७ बिहीवार १९:३७
shares

काठमाडौं महानगरपालिकाले ‘स्मार्ट सहरी प्रविधि प्रतिस्पर्धा- २०७५’ सुरू गरेको छ । ‘हाम्रो काठमाडौं हामी बनाउँछौं’ भन्ने मूल नारासहित कार्यक्रमको शुभारम्भ गर्दै महानगरपालिकाका प्रमुख विद्यासुन्दर शाक्यले सरकारले अघि बढाएको ‘सुखी नेपाली समृद्ध नेपाल’ को अभियानलाई सफल बनाउन सो कार्यक्रम सहयोगी बन्ने बताए ।
‘सुखी नेपाली समृद्ध नेपालको नारा जसले बनायो उसको मात्रै होइन, समृद्ध नेपाल हामी सबैको चाहना हो,’ शाक्यले भने, ‘हामी सबैले त्यो नारालाई सफल बनाउन आ-आफ्नो ठाउँबाट भूमिका खेल्नुपर्छ । राष्ट्र समृद्ध भयो भनेमात्र हामी सुखी र खुसी बन्छौं ।’
प्रमुख शाक्यले सुखी र समृद्ध नेपाल बनाउन काठमाडौँ महानगरपालिका पनि समृद्ध हुनुपर्ने बताए । ‘काठमाडौंलार्इ समृद्ध बनाउन युवा र विज्ञहरुले साथ दिनुपर्छ,’ उनले भने, ‘सकारात्मक सोचका साथ अघि बढ्ने हो भने सबै सफल बन्न सकिन्छ ।’
महानगरको विकासका लागि एउटै सोच लिएर हिँडेमा असम्भव केही नभएको उनको भनाइ छ । करिब ५० लाख मानिस बसोबास गर्ने काठमाडौं महानगरपालिकालार्इ सुन्दर महानगर बनाउने चाहना महानगरपालिका परिवारको रहेको प्रमुख शाक्यले बताए ।
उपप्रमुख हरिप्रभा खड्गीले सबै मिलेर महानगरको विकासमा अघि बढनुपर्ने बताइन् । कार्यक्रमले स्मार्ट महानगर बनाउने सबैको चाहना पूरा हुने उनको विश्वास छ ।
कार्यक्रममा प्रमुख कार्यकारी अधिकृत यादव कोइरालाले अभियानले नेपालमा व्याप्त बेरोजगारी र त्यसका कारण युवाको विदेश पलायनको समस्या समाधानमा सहयोग पुग्ने बताए । नवीनतम ज्ञान, सीप र क्षमता भएका उद्यमीलाई व्यवसाय सञ्चालन गर्न प्रोत्साहन र प्रश्रय दिई प्रविधिमैत्री व्यापारशैली अवलम्बन गर्दै स्वदेशमै उद्धमशीलता प्रवर्धन गर्ने काठमाडौं महानगरपालिकाको योजना रहेको उनले प्रस्ट पारे ।
काठमाडौं महानगरपालिका सहरी योजना आयोगका सदस्य सचिव सरोज बस्नेतले यो प्रतिस्पर्धाबाट क्षमतावान बेरोजगार युवाई आफ्नै देशमा स्वरोजगारीको अवसर सिर्जना हुने विश्वास व्यक्त गरे । कार्यक्रमले विश्वमा प्रचलित र भविष्यमा नवनिर्माण हुन सक्ने नवीन सोचको अन्वेषण गर्ने, काठमाडौं महानगरपालिकाले प्रदान गर्ने सेवा सुविधाहरुको कार्यकुशलता तथा प्रभावकारिता अभिवृद्धि गर्नेलगायतका उद्देश्य लिएको छ ।
प्रतिस्पर्धामा समुदाय तथा वातावरण, सहरी पूर्वाधार विकास, महानगरीय सामुदायिक सेवा र महानगरपालिकाको सार्वजनिक प्रशासन तथा व्यवस्थापन गरी मुख्य चार विषय समेटिएका छन् । हरेक विषयका विभिन्न २८ क्षेत्रमा प्रतिस्पर्धीले आफ्ना नवीन सोच प्रस्तुत गर्न सक्ने महानगरपालिकाले जनाएको छ । महानगरका अनुसार प्रतिस्पार्धामा उत्कृष्ट ठहरिएका नविन सोचलाई एकदेखि ५ लाखसम्म पुरस्कार प्रदान गरिनेछ ।

























