कांग्रेसको महासमिति बैठक नसकिँदै नेविसंघमा विवाद सुरु
वि.सं.२०७५ पुस ८ आइतवार १८:२७
shares

महासमितिको नाममा महाधिवेशन सार्ने षड्यन्त्र भइरहेको असन्तुष्ट पक्षको दाबी
प्रमुख प्रतिपक्षी दल नेपाली कांग्रेसको महासमिति बैठकका कारण भ्रातृ संस्था नेपाल विद्यार्थी संघको १२औँ महाधिवेशन प्रभावित बनेको छ । नेविंघले पुस २८ देखि ३० गतेसम्म १२औँ महाधिवेशन गर्ने गरी गाउँ, वडा, स्थानीय तह, क्षेत्र, जिल्ला र प्रदेशको निर्वाचन तोके पनि महासमितिको बैठकका कारण अहिलेसम्म कुनै तहको निर्वाचन हुन सकेको छैन ।
लामो समयको विधान र नियमावली विवादसँगै पार्टीले विधानलाई पास गरेपछि नेविसंका अध्यक्ष नैनसिंह महरले मङ्सिर १५ गते पत्रकार सम्मेलन गरी नेविसंघको १२औँ महाधिवेशनको कार्यतालिका सार्वजनिक गरेका थिए ।
कार्यतालिकाअनुसार मंसिर २२ गतेभित्र देशभरका सबै माध्यमिक तथा उच्चमध्यामिक विद्यालयमा अधिवेशन गर्नुपर्ने, मङ्सिर २५ भित्र स्थानीय गाउँ नगरको अधिवेशन गर्नुपर्ने, पुस ८ भित्र उपत्यकाभित्रका सबै क्याम्पस र विश्वविद्यालयको अधिवेशन गर्नुपर्ने, पुस १४ भित्र सबै जिल्लाको अधिवेशन गर्नुपर्ने र पुस २० भित्र सबै प्रदेशको अधिवेशन सम्पन्न गर्नुपर्ने छ ।
अध्यक्ष महरले पार्टीका नेताहरू महासमिति बैठकमा जुटेका कारण गाउँ, वडा तथा जिल्ला अधिवेशन गर्न ढिलाइ भएको बताए । ‘नेविसंघले २५ वर्षपछि पहिलो पटक गाउँ–गाउँको अधिवेशन गर्न लागेको छ, त्यसैले पनि केही ढिलाइ भएको हो,’ उनले भने । नेविसंघले १२औँ महाधिवेशनका लागि आठ लाख ५० हजार सदस्यता वितरण गरिसकेको उनले जानकारी दिए ।
नेविसंघका नेता दीपक भट्टराईले महासमितिको नाममा नेविसंघको महाधिवेशन नगर्ने खेल भइरहेको बताए । ‘महाधिवेशन नगरी आफ्नो कार्यकाल लम्ब्याउन वर्तमान नेतृत्व लागेको छ,’ उनले भने । महासमितिको मुखमा आएर निर्वाचनको कार्यतालिका सार्वजनिक गर्नुले पनि निर्वाचन नगर्ने खेल भएको उनको तर्क छ ।

























