पोखरामा छठ पर्वको रौनक
वि.सं.२०७५ कात्तिक २५ आइतवार २३:२२
shares

पर्यटकीय नगरी पोखरामा छठ पर्वको रौनक सुरु भएको छ । पोखराका मुख्य तीन ठाँउमा धुमधामका साथ छठ पर्व मनाउने तयारी गरिएको छ । केही वर्षयता पोखरामा छठ पर्व मनाउन थालेसँगै रौनक बढ्दै गएको छ ।
पोखरा नदीपुरको नारायणथान मन्दिर, बैदामको केदारेश्वर महादेवमणि मन्दिर परिसर (फेवाताल किनारा) र रिठ्ठाघाँट त्रिवेणी धाम (कालिखोला) सेतीनदी किनारामा छठ पुजा मनाउन सरसफाई सहितको तयारी सुरु गरिएको त्रिवेणी घाट छठ पूजा समितिका अध्यक्ष देवनारायण सुतीहारले बताए । छठको पुजा गर्न पूजा स्थालका घाट वरपर सरसफाईको काम सुरु गरिएको छ । आइतबार र सोमबार सरसफाइ गर्दै छठ पूजा स्थल सजाउने काम भइरहेको छ ।
पोखरामा पछिल्ला वर्षदेखि पहाडी मुलकाले समेत छठ पर्व मनाउन थालेका छन । छठको पहिलो दिनमा उनीहरुले आ–आफ्नो घर घरमा सरसफाइ गरी नुहाएर चोखो मिठो खाएर छठ पर्व मनाउने गर्दछन । पोखरामा व्यवस्थित रुपमा छठ पूजा गर्न थालेपछि पहाडी मुलका मानिसहरुले समेत छठ पुजा गर्न थालेको नारायणथान मन्दिरका संरक्षक आनन्द गिरी (अन्ना बाबा) ले बताए ।
छठ पूजाको अन्तिम दिन बुधबार बिहान उदाउँदो सूर्यलाई अर्घ दिएसँगै आगन्तुक भक्तजन सहितका पाहुनाहरुलाई छठ पूजा समितिले प्रसाद वितरणको तयारी गरिएको पूजा समितिका सदस्य राम्जी प्रसाद अग्रहरी (वानिया) ले बताए । केदारेश्वर महादेवमणी परिसरमा शनिबार सोमबारसम्म सरसफाई गरी हाल छठ घाँटमा रंग रोगनको काम सुरु गरिएको समितिका अध्यक्ष भुनेस कुमारले बताए । सोमबार र मंगलबार छठ घाँटमा झिलिमिलि पारी सजिसजावट पार्ने उनले बताए ।
छठमा भक्तजनले केराको खम्मा, उखु, अदुवा, भोगटे, सुन्तला लगायतका फलफुलका बोटहरु सजावट गर्नेछन । सूर्यलाई भगवानको प्रतिको रुपमा पूजा गरे आफ्नो मनोकांक्षा पूरा हुने धार्मिक विश्वास रहेको छ । सष्ठीमा अस्ताउदो सूर्यलाई अर्घ दिने गरिन्छ । विभिन्न फलफूल, कन्दमुल, ठेकुवा, कसार लगायतका सामाग्रिको साथमा पूजा गर्ने प्रचलन छ । सप्तमीमा भने उदाउँदो सूर्यलाई अर्घ दिने प्रचलन रहेको छ

























