काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

राष्ट्रिय सहकारी बैंकको अध्यक्षमा केबी उप्रेतीले यसकारण जित्नुपर्छ

39.8K
shares

सहकारी क्षेत्रमा अहिले राष्ट्रिय सहकारी बैंकको निर्वाचनको सरगर्मी छ । शनिबार र आइतबार (पुस २१ र २२ गते) सहकारी बैंकको १५ औं साधारणसभाले नयाँ नेतृत्व चयन गर्दैछ । त्यसैको सरगर्मीले अहिले सहकारी क्षेत्र तताएको छ ।

सहकारी क्षेत्रको एक मात्र बैंकमा दश हजार सहकारी संस्था सदस्य छन् । लामो समयदेखि सहकारी क्षेत्रमा रहेका बैंकका प्रबन्ध संचालक केबी उप्रेती र वर्तमान अध्यक्ष रमेशप्रसाद पोखरेलबीच प्रतिस्पर्धा हुँदैछ । सहकारी विज्ञ उप्रेतीको उम्मेदवारी परेपछि पोखरेलले पनि समर्थन गर्ने हामी धेरैको अपेक्षा थियो । तर, अहिलेसम्म त्यसो भने भएको छैन । आखिर किन सहकारीकर्मीले केबी उप्रेतीलाई यति धेरै महत्व दिन्छन् ? किन जिताउनैपर्छ केबी उप्रेतीलाई ? उहाँको पृष्ठभूमि र जिताउनुपर्ने केही कारण म यहाँ प्रस्तुत गर्न चाहान्छु ।

दोलखाको नाम्दुमा २०१८ सालमा जन्मिभएका के. बी. उप्रेती (कृष्ण बहादुर उप्रेती) नेपालको सहकारी अभियानका एक अग्रज, क्रियाशील र व्यवस्थापकीय क्षमता भएका अभियन्ता हुनुहुन्छ । उप्रेती देशभरका सहकारीकर्मीहरुबीच लोकप्रिय पनि हुनुहुन्छ । विद्यार्थीकालदेखि नै नेतृत्वमा रहेर काम गर्नुभएका उहाँ २०४८ देखि २०५० सम्म पिपल्स क्याम्पसको स्ववियू सभापति बन्नुभएको थियो । विद्यार्थी राजनीति, सामाजिक कार्य, पत्रकारिता तथा सैनिक महाविद्यालयमा शिक्षण पेशासमेत गर्नुभएका उप्रेती व्यवस्थापन विषयमा स्नातकोत्तर हुनुहुन्छ ।

०५५ सालदेखि सहकारी अभियानमा सक्रिय उप्रेतीले काठमाडौंमा जनता बहुउद्देश्यीय सहकारी संस्था गठन गरेर काठमाडौंको सहकारी अभियानलाई एकीकृत गर्नुभयो । १३ वटा मात्र सदस्य रहेको काठमाडौं जिल्ला सहकारी संघमा २ हजार भन्दा बढी सदस्य बनाउने काम उहाँले २ कार्यकालमै सम्भव बनाउनुभयो । काठमाडौंसँगै देशभरको सहकारी अभियानलाई सक्रिय बनाउन, सहकारीकर्मीलाई सहकारी क्षेत्रमा केन्द्रित भएर लाग्न प्रेरित गर्ने काममा उहाँको योगदान अतुलनीय रहेको कुरामा दुईमत नहोला ।

सहकारी अभियानको शीर्षस्थ निकाय राष्ट्रिय सहकारी महासंघमा दुई कार्यकाल लेखा संयोजक रहेर काम गरिसक्नुभएका उप्रेती महासंघको अध्यक्षको दाबेदार हुनुहुन्थ्यो । तर, उहाँले महासंघमा अन्य नेताहरुलाई जिम्मेवारी लिनका लागि सहयोग गर्नुभयो । यसबाट उहाँले आफू सहयोगी र उदार रहेको कुरा पुष्टि गर्नुभयो ।

नेपालको सहकारी अभियानको लामो समयसम्मको प्रयास पश्चात प्राप्त राष्ट्रिय सहकारी बैंक लिमिटेड स्थापनामा महत्वपूर्ण योगदान गर्नुभएका उप्रेतीले केही समय स्वयंसेवकको रुपमा प्रबन्ध सञ्चालकको जिम्मेवारी लिनुभयो । बैंकलाई देशव्यापी बनाउँदै अगाडि बढ्ने क्रममा उहाँ दुई कार्यकाल प्रबन्ध सञ्चालकको रुपमा कार्यरत हुनुहुन्थ्यो । अर्को सहकारी बैंक बनाउनेभन्दा भई रहेको सहकारी बैंकलाई सबैको साझा, सक्षम र दीगो बनाउने सोच र कार्यक्रमका साथ सबै सहकारीको विश्वास आर्जन गर्न उप्रेती सफल मानिनुहुन्छ ।

सहकारीका विभिन्न राष्ट्रिय तथा अन्तर्राष्ट्रिय तालिम तथा अनुभव प्राप्त गर्नुभएका उहाँ हालै मात्र एशिया तथा प्यासिफिक क्षेत्रका कृषि सहकारीहरुको विकासको लागि संजाल एनईडीएसीको वरिष्ठ उपाध्यक्ष हुनुहुन्छ । राष्ट्रिय सहकारी बैंकको प्रबन्ध सञ्चालकको जिम्मेवारीबाट अलग भई बैंकको उहाँ अहिले अध्यक्षको दाबीसहित मैदानमा हुनुहुन्छ । उप्रेती सहकारी अभियानमा लोकप्रिय र सबैका कुरा सुन्ने, बैंकजस्तो व्यावसायिक संस्थामा राजनीतिक आस्था तथा अन्य कुनै पनि आधारमा कसैलाई काखापाखा नगर्ने अभियन्ता हुनुहुन्छ ।

आगामी दिनमा सहकारी बैंकलाई देशभर शाखा विस्तार गर्ने, प्रदेश स्तरीय सहकारी बैंकको शाखा स्थापना गर्ने, राज्यका गरिबी निवारण र स्वरोजगार कोष लगायतका सबै पुँजी सहकारी मार्फत परिचालन गर्ने, सहकारीहरुलाई व्यावसायिक र उत्पादनमा लाग्न सहयोग र समन्वय गर्ने तथा रोजगार सिर्जना गर्ने कार्यक्रममा बैंकलाई परिलक्षित गर्न उहाँ सक्षम हुनुहुन्छ । सहकारीकर्मीहरुको भावना अनुसार नै बैंकलाई देशव्यापी बनाउन उहाँलाई सबैको सहयोग र समर्थन आवश्यक छ । एकातिर सहकारी अभियानलाई प्रभावकारी बनाउन र सहकारी बैंकलाई पनि तीव्र गतिमा विस्तार गर्न केबी उप्रेतीको उम्मेदवारी र विजय महत्वपूर्ण छ ।
(थापा सहकारीकर्मी हुन् )