जिल्ला सरकारी वकिल कार्यालय, राैतहटले दर्जनभन्दा बढी व्यक्तिलाई इँटाभट्टाको चिम्नीमा हालेर जिउँदै जलाएको आरोप लागेका सांसद मोहम्मद अफताब आलमविरुद्ध मुद्दा दर्ता गरेकाे छ ।

आलमसहित उनका भाइ मोहम्मद महताब आलम, शेख भदई, मोहम्मद मोविन आलम, शेख सेराज, बद्री सहनी, शेख फजलेहक, सगिर आलम, शेख जुमइन भन्ने शेख मलकार र गौरीशंहर साहसमेत विरुद्ध अभियोगपत्र दायर गरेको हो । थुनछेककाे बहस भने मंगलबारमात्र हुने अदालतले जनाएकाे छ ।

वकिल कार्यालयले आलमसहितका व्यक्तिले त्रिलोकप्रताप सिंह र ओसी अख्तर मियाँसहित दर्जनभन्दा बढी व्यक्तिलाई इट्टाभट्टाको चिम्नीमा जिउँदै जलाई क्रुर मानवताविरुद्धको कसूर अपराध गरेको अभियोगपत्र दर्ता गराएको हो ।

आलमबाहेक अरु सबै फरार छन् । उनीहरुविरुद्ध पक्राउ पूर्जी जारी गर्न पनि सरकारी वकिल कार्यालयले माग गरेको छ । अभियोगपत्रमा सरकारी वकिल कार्याललयले आलमसहितका व्यक्तिले ‘कर्तव्य ज्यान, ज्यान मार्ने उद्योग र गैरकानुनी रुपमा विस्फोटक पदार्थ राख्ने’ अपराध गरेको दावीसहित उल्लेखित तीनवटै कसूरमा सजाय माग गरेको छ ।

त्यस्तै घटनाका घाइते सफी अहमद र गौरीशंकर राम चमारमाथि ज्यान मार्ने उद्योग गरेको आरोपमा मुलुकी ऐन २०२० को ज्यानसम्बन्धी महलको १५ नम्बर र मुलुकी अपराध संहिताको १८३ (२) बमोजिम कारबाही गर्न मागदावी गरिएको छ ।

मुलुकी ऐन २०२० को ज्यानसम्बन्धी महलको १५ नम्बर अनुसार ज्यान मार्ने उद्योग गर्नेलाई ५ देखि १२ वर्षसम्म कैद सजाय हुनेछ । यही कसूरमा मुलुकी अपराध संहिताले १० वर्ष कैद र १ लाख रुपैयाँसम्म जरिवाना हुने व्यवस्था गरेको छ । त्यस्तै मुलुकी ऐन २०२० को ज्यानसम्बन्धी महलको १ र १३ (१) अनुसार र मुलुकी अपराध संहिताको दफा १७७ (२) अनुसार कारबाही गर्न माग गरिएको छ । यो कसूरमा सर्वस्वसहित जन्मकैद हुने व्यवस्था छ ।

प्रकाशित समय : २१:४३ बजे