काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

चिराचिरा परेको जमिनले ताम्सुवासीमा त्रास, सुरक्षित बासको प्रतीक्षा

1.51K
shares

बाजुरा । बाजुराको त्रिवेणी नगरपालिका–९ ताम्सु गाउँमा जमिन चिराचिरा परेपछि स्थानीय त्रासमा छन् । मनसुनी वर्षापछि ठाउँठाउँमा जमिन धसिनुका साथै पहिरोको जोखिम बढेपछि गाउँका ५८ परिवार घर हुँदाहुँदै राति त्रिपालमुनि बस्न बाध्य भएका छन् ।

“जमिनमा परेको चिरा हेर्दा आफ्नै मन फाटेजस्तो लाग्छ । जमिन जति फाट्दै जान्छ, त्यति नै मन पनि फाट्दै जान्छ,” स्थानीय टेक थापाले भन्नुभयो ।

गत साउन २८ गते अविरल वर्षासँगै आएको पहिरोले दुई घर पुरिएका थिए । त्यस क्रममा २० वर्षीया प्रतीक्षा थापाको मृत्यु भएको थियो भने दुई जना घाइते भएका थिए । पहिरोले करिब ६० रोपनी खेतीयोग्य जमिनमा समेत क्षति पुर्‍याएको छ । खानेपानी र विद्युत् सेवासमेत प्रभावित भएका छन् ।

घरका आँगनदेखि खेतबारीसम्म चिरा परेपछि स्थानीयलाई घरमा बस्नसमेत डर लाग्न थालेको छ । पानी पर्दा चिराबाट पानी पस्ने, जमिन थप धसिने र जुनसुकै बेला पहिरो खस्न सक्ने जोखिम रहेको स्थानीय बताउँछन् ।

त्रिवेणी नगरपालिकाले जमिनको अवस्था हेर्दा पूरै बस्ती स्थानान्तरण गर्नुपर्ने अवस्था रहेको जनाएको छ । तर, बस्ती स्थानान्तरणका लागि नगरपालिकाको स्रोत पर्याप्त नभएकाले प्रदेश र सङ्घीय सरकारको सहयोग आवश्यक रहेको नगरप्रमुख कर्णबहादुर थापाले बताउनुभएको छ ।

स्थानीयले तत्काल गाउँको भौगर्भिक अध्ययन गरी जोखिमयुक्त परिवारलाई सुरक्षित स्थानमा स्थानान्तरण गर्न माग गरेका छन् ।

“आकाशमा बादल देखिन्छ, हाम्रो नजर पहाडतिर जान्छ । पानी पर्न थाल्छ, ध्यान जमिनतिर हुन्छ,” टेक थापाले भन्नुभयो, “त्यसैले हामीलाई राहत होइन, सुरक्षित बास चाहिएको छ ।”

जिल्ला विपद् व्यवस्थापन समितिका अनुसार बाजुराका नौवटै स्थानीय तह बाढीपहिरोको उच्च जोखिममा छन् ।