नेपाली कांग्रेसले चुनावी अभियानका क्रममा राष्ट्रिय झण्डाको प्रयोग गर्दा उच्च सम्मान र सतर्कता अपनाउन पार्टीका सबै तहका समितिलाई निर्देशन दिएको छ ।

कांग्रेस केन्द्रीय कार्यालयले आइतबार प्रदेश, जिल्ला तथा प्रतिनिधिसभा क्षेत्रीय कार्यसमितिलाई परिपत्र जारी गर्दै राष्ट्रिय झण्डाको प्रयोग मर्यादित, सम्मानजनक र कानुनसम्मत हुनुपर्ने स्पष्ट पारेको हो । परिपत्रमा निर्वाचन ऐन र आचारसंहिताअनुसार निश्चित संख्यामा मात्र राष्ट्रिय झण्डा प्रयोग गर्न सकिने उल्लेख गरिएको छ ।

परिपत्रमा राष्ट्रिय झण्डालाई व्यक्तिको टाउकोभन्दा माथि राखेर सम्मानपूर्वक फहराउनुपर्ने र झण्डा भुइँमा खसाल्ने, ओढाउने वा अपमानजनक ढंगले प्रयोग गर्ने कार्य नगर्न विशेष जोड दिइएको छ । उम्मेदवार वा प्रचारकले कुनै पनि व्यक्तिको शरीरमा झण्डा ओढाउने कार्य निर्वाचन आचारसंहिता र सम्मान दुवैको दृष्टिले गलत हुने जनाइएको छ ।

कांग्रेसले राष्ट्रिय शोकका अवसरमा हुने शवयात्रा वा चितामा राष्ट्रिय झण्डा ओढाउने परम्परा बाहेक अन्य अवस्थामा त्यस्तो अभ्यास नगर्न पनि निर्देशन दिएको छ । पार्टीले राष्ट्रिय झण्डाको गरिमा जोगाउने दायित्व सबै राजनीतिक दल र नागरिकको साझा जिम्मेवारी भएको उल्लेख गरेको छ ।

प्रकाशित समय : १२:५१ बजे