निजी क्षेत्रले चालु पुँजी कर्जाको विद्यमान व्यवस्था संशोधनका लागि चर्को दबाब दिन थालेको छ । केन्द्रीय बैंकले आगामी आर्थिक वर्षको मौद्रिक नीति सार्वजनिक गर्ने तयारी गरेसँगै निजी क्षेत्रले एकजुट भएर राष्ट्र बैंक र अर्थ मन्त्रालयलाई दबाब दिएको हो ।

मौद्रिक नीतिका लागि आवश्यक छलफल गरी सुझाव संकलन गरेर सार्वजनिक गर्ने अन्तिम तयारीमा केन्द्रीय बैंक जुटिरहेको छ । यहीबीचमा निजी क्षेत्रका उद्योगी–व्यवसायीदेखि उनीहरू सम्बद्ध संघसंस्थाहरूले दबाब बढाएका छन् ।

केही दिनअघि निजी क्षेत्रका तीन प्रमुख छाता संगठन उद्योग वाणिज्य महासंघ, उद्योग परिसंघ र चेम्बर अफ कमर्सले संयुक्त रुपमा कार्यक्रम गरी चालु पुँजी कर्जाको व्यवस्था संशोधन गर्नुपर्नेमा जोड दिएका थिए ।

गभर्नर महाप्रसाद अधिकारी पनि उपस्थित रहेको कार्यक्रममा उनीहरूले चालु पुँजी कर्जाको सवालमा विगतमा गल्ती भएको तर अब त्यस्तो नहुने बताएका थिए ।

उद्योग वाणिज्य महासंघका अध्यक्ष चन्द्र ढकालले विगतमा गल्ती भए पनि अहिले कर्जा लिने उद्योगी–व्यवसायी र दिने बैंकिङ क्षेत्र यसबारे सचेत भइसकेको बताएका थिए ।

प्रकाशित समय : १०:३५ बजे