वीरगञ्ञका १९ वर्षीय विशाल पाण्डे कक्षा १२ को परिक्षा दिएर विदेश पढ्न जान्नका लागि काठमाडौं आइएलस गरिरहेका छन् । उनी अमेरिका र क्यानडामध्ये एउटा देश अध्ययनका गर्न जाने सोचमा छन् ।

भृकुटीमण्डप प्रदर्शनी हलमा भेटिएका पाण्डेले भविष्यको सुरक्षाकै लागि विदेश अध्ययन गर्न जान्न लागेको बताए । ‘नेपालमा पढने मात्र हो । विदेशमा पढ्दै काम पनि पाइन्छ । नेपालमा जति दुःख गरेपनि अन्तिममा विदेशनै जान्नुपर्छ । यो अहिले पनि देखिएको छ ।’ उनले भने, ‘बेलैमा विदेश पढ्न गयो भने, भविष्यको सुरक्षा हुन्छ । नेपालमा पढीसकेपछि पनि रोजगारीका राजनीतिक पावर मात्र पाइन्छ । त्यही भएर बेलैमा बाहिर पढ्न जान्न लागेको हुँ ।’

सरकारले युवा पलायन रोक्ने नीति नल्याएका कारण नेपाली युवा विदेशमा निर्भर हुनुपरेको उनको भनाइ छ ।

विशालजस्तै ललिपुरकी सोविना क्षेत्रीले विविए अन्तिम वर्षको परिक्षा दिने तयारीमा छिन । उनीपनि अहिले विदेश अध्ययनमा जान्ने सोच बनाएर कान्तिपुर हिसान एडुफेयर (शैक्षिक मेला) भृकुटीमण्डपमा आएकी छिन् ।

विविएको परिक्षा सकेर अध्ययनका लागि बाहिर जाने विषयमा शैक्षिक मेलामा बुझन आएको सोविनाले बताइन् । ‘नेपालमा बस्न सक्ने वातावरण नै छैन । त्यही भएर अध्ययन गर्न बाहिर जान्न लागेको हुँ । नेपालमा पढ्यो जागिर खान पावर चाहिन्छ । विदेश गएपछि बढ्दै काम पनि गर्न पाइन्छ ।’ उनले भनिन, ‘कक्षा १२ सकेर जान्ने सोच थियो । तर, परिवारले रोके । अब चाँही अष्टेलिया जाने हो । उत्तै सेटल भइन्छ । नेपालमा जागिर पाइँदैन भनेर चिन्ता हुँदैन् ।’ \

विदेशमा अध्ययन गर्न जाँदा भविष्यको चिन्ता नहुने उनको बुझाइ छ ।

विशाल र सोविनाजस्तै भृकुटीमण्डप प्रदर्शनी हलमा भइरहेको शैक्षिक मेलामा दैनिक ४५ हजारभन्दा धेरै विद्यार्थी मेला हेर्ने र बुझन आउने गरेको कान्तिपुर हिसान एडुफेयरका संयोजक टंकराज आचार्यले जानकारी दिए ।
शैक्षिक मेला हेर्ने विद्यार्थी र उनीहरुका अविभावकहरुको उपस्थीति राम्रो रहेको उनले बताए । शैक्षिक मेला सुरु भएयता ९० हजारभन्दा मेलाको अवलोकन गरेको र आजसम्म एक २० हजार बढीले मेलाको अवलोकन गर्ने उनको भनाइ छ ।

कान्तिपुर हिसान एडुफेयर (शैक्षिक मेला) भृकुटीमण्डप प्रदर्शनी हलमा चलिरहेको छ । एसईई र कक्षा १२ को परीक्षा दिई नतिजा कुरेर बसेका विद्यार्थी र तिनका अभिभावकलाई लक्षित गरी यो मेला असार १० गतेबाट सुरु भएको हो ।

‘उत्कृष्ट शिक्षा नेपालमै’ भन्ने नारासहित कान्तिपुर पब्लिकेसन्स र उच्च शिक्षालय तथा माध्यमिक विद्यालय संघ (हिसान) ले संयुक्त आयोजना गरेको आठौं संस्करण हो ।

जेठ ३२ गते सुरु भएको मेलामा काठमाडौं महानगरपालिकाले हस्तक्षेप गरेपछि रोकिएको थियो । पाटन उच्च अदालतले मेलामा अवरोध नगर्न अन्तरिम आदेश दिएपछि पुनः मेलालाई निरन्तरता दिएको आयोजकले जनाएको छ ।

मेलामा कक्षा ११ र १२ पठनपाठन गराउने विद्यालयहरू, त्रिभुवन, काठमाडौं, पूर्वाञ्चल, पोखरा, मध्यपश्चिम विश्वविद्यालय र सीटीईभीटीबाट सम्बन्धन प्राप्त शिक्षण संस्था सहभागी भएको हिसानले जनाएको छ ।

यस्तै, कक्षा ११ र स्नातक तह (ब्याचलर) मा भर्नाको तयारीमा रहेका विद्यार्थी, अभिभावकलाई पढ्ने संकाय÷विषय, पाठ्यक्रम, शैक्षिक संस्था, भर्ना प्रक्रिया, अनुमानित शुल्क, परीक्षा, मूल्यांकन विधि, छात्रवृत्ति प्रक्रियालगायत विविध जानकारी दिइनेछ । शैक्षिक संस्थाका शिक्षक र पढिरहेका विद्यार्थीसँग छलफल र परामर्श लिन सक्ने व्यवस्था गरिएको छ ।

आयोजकका अनुसार मेलामा पहिलो पटक काठमाडौं विश्वविद्यालयले सहभागिता जनाएको छ ।