स्थानीय तह निर्वाचनकाे मिति नजिकिँदै जाँदा राजनीतिक दलहरूकाे दाैडधूप तीव्र छ । दलका शिर्ष नेताहरूलाई चुनावी सभामा सहभागी हुन भ्याइनभ्याई छ । सत्ता पक्ष र प्रतिपक्ष दुवै हाेडबाजीकै शैलीमा सभा गरिरहेका मात्र छैनन्, आचारसंहिताकाे उल्लंघन गर्दै आराेप-प्रत्याराेपमै उत्रिएका छन् ।

यसै क्रममा सत्तारुढ गठबन्धनले सोमबार कैलालीको धनगढीमा चुनावी सभा गर्दैछ । सभामा प्रधानमन्त्री एवं नेपाली कांग्रेसका सभापति शेरबहादुर देउवासहित गठबन्धन दलका अन्य शीर्ष नेताले सम्बोधन गर्ने कार्यक्रम रहेकाे छ ।सभामा सहभागी हुन प्रधानमन्त्री देउवा आइतबार बेलुकी धनगढी पुगिसकेका छन् । देउवा नेपाली सेनाको हेलिकप्टरमार्फत् धनगढी आर्मी ब्यारेक उत्रिएका हुन् । सभामा सम्बोधन गर्न नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ पनि आइतबार बेलुकी नै धनगढी पुगेका छन् ।

धनगढीको सभापछि प्रधानमन्त्री देउवा डडेलधुरा जाने कार्यक्रम रहेको जिल्ला प्रहरी कार्यालय कैलालीले जनाएकाे छ ।  कांग्रेसले मंगलबार डडेलधुरा चुनावी सभा राखेको छ । प्रचण्डले सोमबार नै कैलालीको हसुलिया, डोटी, र कञ्चनपुरको बेलौरी लगायतका क्षेत्रमा हुने चुनावी सभामा सम्बोधन गर्ने कार्यक्रम रहेको माओवादीले जनाएकाे छ ।